پنجاب کی کوٹ لکھپت جیل میں قید پی ٹی آئی رہنماؤں نے موجودہ مسائل سے نکلنے کا واحد حل مذاکرات کو قرار دیا ہے۔
کوٹ لکھپت جیل میں قید پی ٹی آئی رہنماؤں نے اپنے وکیل کے ذریعے ایک کھلا خط لکھا ہے، جس میں مذاکرات سے متعلق بات چیت کی گئی ہے۔
مزید پڑھیں: پی ٹی آئی کے ساتھ خفیہ مذاکرات اور کوٹ لکھپت جیل، طارق جہانگیری نااہل، وی ٹاک میں اہم خبریں سامنے آگئیں
پی ٹی آئی کے سابق وائس چیئرمین شاہ محمود قریشی، یاسمین راشد، عمر سرفراز چیمہ، اعجاز چوہدری اور میاں محمودالرشید نے خط لکھا۔
خط میں کہا گیا ہے کہ گزشتہ 3 سال 8 ماہ سے پاکستان شدید بحرانوں کا شکار ہے، ایسی صورت حال میں ہر محب وطن کی ذمہ داری ہے کہ وہ ملک کا سوچے اور پُرامن ذرائع سے مقاصد حاصل کرے۔
خط کے متن میں درج ہے کہ ہم کوٹ لکھپت جیل میں قید پی ٹی آئی کے مرکزی رہنما سمجھتے ہیں کہ ہر سطح پر گفت و شنید ہی مسائل کا واحد حل ہے۔
خط میں کہا گیا ہے کہ گفت و شنید ہی بالعموم پاکستان اور بالخصوص تحریک انصاف کو بحران سے نکال سکتی ہے۔
پی ٹی آئی رہنماؤں نے کہاکہ بانی پی ٹی آئی عمران خان نے تحریک تحفظ آئین کو ذمہ داری دی ہے کہ وہ قومی جماعتوں کی مشاورت سے حل نکالیں، وسیع تر مشاورت درحقیقت مذاکرات کا دروازہ ہے۔
خط میں کہا گیا ہے کہ محمود اچکزئی اور علامہ راجا ناصر سے توقع کرتے ہیں کہ وہ قوم کی رہنمائی کریں گے۔
مزید پڑھیں: اڈیالہ جیل سے کوٹ لکھپت تک کا سفر، پی ٹی آئی مذاکرات کے لیے کیا نئی حکمت عملی اپنا رہی ہے؟
واضح رہے کہ کوٹ لکھپت جیل میں قید پی ٹی آئی رہنما اس سے قبل بھی مذاکرات کی حمایت کر چکے ہیں، تاہم بانی پاکستان تحریک انصاف عمران خان نے ہمیشہ سیاستدانوں سے بات چیت سے انکار کیا ہے۔
