خیبرپختونخوا حکومت کے معاون خصوصی برائے اطلاعات شفیع جان نے کہا ہے کہ عمران خان نے جو پیغام سہیل آفریدی کو دیا اس پر عملدرآمد کی طرف جا رہے ہیں۔
مزید پڑھیں: ’اسٹریٹ موومنٹ کے لیے تیاری کریں‘، عمران خان کی سزا کے بعد احتجاج کی کال
نجی ٹی وی سے گفتگو کرتے ہوئے انہوں نے کہاکہ جب بھی تحریک کی کال دی جائےگی تو لاکھوں لوگ اسلام آباد کی جانب مارچ کریں گے، یہ کچھ لوگوں کی غلط فہمی ہے کہ لوگ نہیں نکل رہے۔
انہوں نے کہاکہ حکومت مخالف تحریک کے لیے عوام کو متحرک کیا جا رہا ہے، وزیراعلیٰ سہیل آفریدی جلسے کررہے ہیں، اور بڑی تعداد میں لوگ انہیں سننے کے لیے آتے ہیں۔
شفیع جان نے کہاکہ تحریک کے حوالے سے تمام تر ذمہ داری محمود اچکزئی اور علامہ راجا ناصر عباس کے پاس ہے، وہ جو بھی فیصلہ کریں گے، پی ٹی آئی اس پر عمل کرےگی۔
انہوں نے کہاکہ مذاکرات اس صورت میں ہوں گے کہ ہمارا مینڈیٹ واپس کیا جائے، یا پھر ہمیں نئے انتخابات بھی قبول ہیں۔
مزید پڑھیں: مذاکرات کی بات کرنے والوں کو عمران خان کا ساتھی نہیں کہا جا سکتا، علیمہ خان
انہوں نے کہاکہ مولانا فضل الرحمان اگر اس حکومت کے خلاف جانا چاہتے ہیں تو ہم انہیں ساتھ لے کر چلیں گے، جو بھی اس حکومت کے خلاف جانا چاہتا ہے ہم اس کے ساتھ ہیں۔
