نائب وزیراعظم و وزیر خارجہ سینیٹر محمد اسحاق ڈار کی زیر صدارت کابینہ کمیٹی برائے نجکاری کا اہم اجلاس منعقد ہوا، جس میں پاکستان میں نجکاری کے عمل سے متعلق تفصیلی بریفنگ دی گئی۔
اجلاس میں نجکاری کمیشن اور وزارتِ نجکاری نے کمیٹی کو ملک میں جاری اور آئندہ نجکاری کے عمل پر جامع بریفنگ دی۔ کمیٹی نے نجکاری کمیشن کی جانب سے اختیار کیے گئے تمام مراحل کا تفصیلی جائزہ لیا، سفارشات پر غور کیا اور اس امر پر زور دیا کہ نجکاری کے تمام مراحل میں حکومت کی وضع کردہ پالیسیوں، قوانین اور طریقۂ کار پر سختی سے عمل کیا جائے۔
یہ بھی پڑھیے: پی آئی اے کی نجکاری کا عمل تاریخی مرحلے میں داخل، وزیراعظم کا اظہارِ اعتماد
نائب وزیراعظم و وزیر خارجہ اسحاق ڈار نے ہدایت کی کہ نجکاری سے متعلق تمام لین دین قانون کے مطابق انجام دیے جائیں اور اس پورے عمل میں بہترین بین الاقوامی نجکاری طریقۂ کار کو اپنایا جائے۔
انہوں نے متعلقہ حکام کو یہ بھی ہدایت کی کہ نجکاری کے عمل میں شامل تمام فریقین کو یکساں مواقع فراہم کیے جائیں اور شفافیت کو ہر صورت یقینی بنایا جائے۔
اجلاس میں وفاقی وزرائے خزانہ، توانائی اور تجارت نے شرکت کی، جبکہ وزیراعظم کے مشیران برائے نجکاری، صنعت و پیداوار، اور خصوصی معاونین برائے خزانہ بھی اجلاس میں موجود تھے۔ اس کے علاوہ طارق باجوہ سمیت کابینہ، نجکاری، منصوبہ بندی، تجارت، دفاع، قانون اور توانائی کے وفاقی سیکریٹریز اور نجکاری کمیشن کے اعلیٰ حکام نے بھی اجلاس میں شرکت کی۔
یہ بھی پڑھیے: قومی ایئر لائن پی آئی اے کی نجکاری کا عمل شروع، 3 کمپنیوں نے بولی لگادی
اجلاس کے دوران اس بات کا اعادہ کیا گیا کہ نجکاری کا عمل ملکی معیشت کو مستحکم کرنے، سرمایہ کاری کے فروغ اور سرکاری اداروں کی کارکردگی بہتر بنانے کے لیے نہایت اہم ہے، اور حکومت اس عمل کو شفاف، منصفانہ اور قانون کے دائرے میں رہتے ہوئے آگے بڑھائے گی۔
