پاکستان انٹرنیشنل ایئرلائنز (پی آئی اے) کی نجکاری کا فیصلہ کن مرحلہ مکمل ہو گیا ہے، جس کے تحت 75 فیصد حصص کی مسابقتی بولی کامیابی سے انجام پا گئی۔ نجکاری سے متعلق تفصیلات پاکستان اسٹاک ایکسچینج کو ارسال کر دی گئی ہیں، جن کے مطابق حکومت کو فوری طور پر 10 ارب روپے سے زائد رقم موصول ہوگی جبکہ ایئرلائن میں 124 ارب روپے سے زیادہ کی سرمایہ کاری کی جائے گی۔
پی آئی اے ہولڈنگ کمپنی کی جانب سے پاکستان اسٹاک ایکسچینج کو بھیجے گئے خط میں بتایا گیا ہے کہ حکومت پاکستان نے 23 دسمبر 2025 کو پاکستان انٹرنیشنل ایئرلائنز کارپوریشن لمیٹڈ کے 75 فیصد حصص کی مسابقتی بولی کا عمل مکمل کر لیا ہے۔ یہ بولی نجکاری کمیشن کے ذریعے کرائی گئی، جس میں تین کنسورشیمز نے حصہ لیا۔
یہ بھی پڑھیں:وزیراعظم شہباز شریف کی پی آئی اے نجکاری کا عمل تیز کرنے کی ہدایت
خط کے مطابق ریزرو پرائس کے بعد عارف حبیب کارپوریشن کی قیادت میں کنسورشیم نے سب سے زیادہ بولی لگائی، جس کی مجموعی مالیت 135 ارب روپے رہی۔ یہ بولی پی آئی اے کے 75 فیصد کنٹرولنگ حصص کے لیے دی گئی۔
تفصیلات کے مطابق عارف حبیب کنسورشیم حکومت کو مجموعی بولی کی رقم کا 7.5 فیصد، یعنی 10 ارب 12 کروڑ 50 لاکھ روپے ادا کرے گا۔ یہ رقم پی آئی اے ہولڈنگ کمپنی کے ذریعے حکومت کو منتقل کی جائے گی۔
باقی 92.5 فیصد رقم، جو 124 ارب 87 کروڑ 50 لاکھ روپے بنتی ہے، پی آئی اے کارپوریشن لمیٹڈ میں سرمائے کے طور پر لگائی جائے گی۔ کمپنی کے خط میں واضح کیا گیا ہے کہ یہ سرمایہ کاری 2 مراحل میں کی جائے گی۔
پہلے مرحلے میں 83 ارب 25 کروڑ روپے بطور ایڈوانس پی آئی اے کارپوریشن لمیٹڈ میں جمع کروائے جائیں گے، جبکہ دوسرے مرحلے میں 41 ارب 62 کروڑ 50 لاکھ روپے 12 ماہ کی مدت میں ادا کیے جائیں گے۔
خط میں مزید کہا گیا ہے کہ پی آئی اے کی نجکاری کا یہ معاہدہ حتمی قانونی دستاویزات کی تکمیل اور متعلقہ ریگولیٹری منظوریوں سے مشروط ہوگا۔
