وزیر اعلیٰ پنجاب مریم نواز شریف کی ہدایت پر محکمہ ہاؤسنگ پنجاب نے مین ہول کورز ’گٹر ڈھکن‘ چوری میں ملوث منظم مافیا کے خلاف سخت قانون سازی اور کارروائیوں کی تیاری شروع کر دی ہے۔
سیکریٹری ہاؤسنگ نورالامین مینگل نے واسا پنجاب کو احکامات جاری کرتے ہوئے کہا کہ چوری میں ملوث افراد کے لیے قید اور بھاری جرمانے نافذ کیے جائیں گے، جن پر 10 کروڑ روپے تک جرمانہ عائد کیا جا سکتا ہے۔
مزید پڑھیں: ’بطور میئر کامیاب نہیں ہو سکا‘، مرتضیٰ وہاب کا بچے کے گٹر میں گرنے کے واقعے پر اظہار ندامت
تمام اضلاع کی اسپیشل برانچ ٹیمیں ملوث افراد کی نشاندہی میں مدد کریں گی، جبکہ واسا کے ایم ڈی ہر ضلع میں مافیا کا سراغ لگانے میں اپنا کردار ادا کریں گے۔
سیکریٹری ہاؤسنگ کے مطابق، موجودہ مین ہولز کی فوری نشاندہی کے لیے خصوصی ٹیمیں کام کر رہی ہیں اور عوام کے جان و مال کے تحفظ کو یقینی بنایا جا رہا ہے۔
انہوں نے کہا کہ مین ہول چور مافیا میں زیادہ تر منظم گروہ شامل ہیں، نشے کے عادی افراد کم تعداد میں ہیں اور اس ابہام کا سالوں سے فائدہ اٹھایا جا رہا ہے۔
مزید پڑھیں:گٹر کے ڈھکن چوری کرنے والوں کو موقع پر لا کر گولی ماری جائے، خواجہ آصف شدید غصے میں کیوں؟
وزیراعلیٰ پنجاب کی ہدایت کے مطابق تمام اضلاع میں قوانین کا یکساں نفاذ کیا جائے گا تاکہ شہر اور دیہی علاقوں میں مین ہول کورز کی حفاظت کو یقینی بنایا جا سکے۔
