اسلام آباد میں بین الصوبائی ڈکیت گینگ کے خلاف کارروائی کے دوران اس وقت کشیدگی پیدا ہو گئی جب تھانہ کھنہ کی حدود میں ملزمان کے ساتھیوں نے پولیس ٹیم پر فائرنگ کر دی۔ پولیس کی بروقت حکمتِ عملی اور حفاظتی انتظامات کے باعث کوئی اہلکار زخمی نہیں ہوا۔
اسلام آباد پولیس کے ترجمان کے مطابق تھانہ کھنہ کی پولیس ریڈنگ ٹیم ڈکیت گینگ کے تین ارکان کو گرفتار کر کے واپس جا رہی تھی کہ راستے میں پہلے سے چھپے ہوئے ان کے ساتھیوں نے اچانک پولیس ٹیم پر فائرنگ شروع کر دی۔
یہ بھی پڑھیں:اسلام آباد پولیس کی کارروائی، دہرے قتل کا مجرم گرفتار
فائرنگ کے نتیجے میں گرفتار تینوں ملزمان زخمی ہو گئے، تاہم پولیس اہلکار بلٹ پروف جیکٹس اور دیگر حفاظتی اقدامات کے باعث محفوظ رہے۔ پولیس نے فوری طور پر علاقے کو گھیرے میں لے کر صورتحال پر قابو پا لیا۔
ترجمان کے مطابق گرفتار ملزمان نے تھانہ کھنہ کی حدود میں ایک فارمیسی سمیت دیگر وارداتوں میں ملوث ہونے کا انکشاف کیا ہے۔ ملزمان اسلام آباد اور راولپنڈی میں دکانوں کی ڈکیتی، راہزنی اور دیگر سنگین جرائم کے متعدد مقدمات میں مطلوب تھے۔
پولیس کا کہنا ہے کہ فرار ہونے والے ساتھی ملزمان کی گرفتاری کے لیے علاقے میں سرچ آپریشن جاری ہے، جبکہ زخمی ملزمان کو طبی امداد فراہم کی جا رہی ہے۔
