حکومت کا اعلیٰ سطح وفد آج سابق وزیراعظم محترمہ بینظیر بھٹو شہید کی برسی کی تقریب میں شرکت کے لیے گڑھی خدا بخش روانہ ہوا۔ اسپیکر قومی اسمبلی سردار ایاز صادق کی قیادت میں وفد میں مشیر وزیرِاعظم رانا ثناء اللہ، وفاقی وزیر طارق فضل چوہدری اور اراکین قومی اسمبلی شامل ہیں۔
یہ بھی پڑھیں:بینظیر بھٹو کی برسی پر آزاد کشمیر میں عام تعطیل کا اعلان
وفد وزیرِاعظم شہباز شریف کی خصوصی ہدایت پر تقریب میں شرکت کرے گا اور پیپلز پارٹی کی مرکزی قیادت سے بھی ملاقاتیں کرے گا۔
سردار ایاز صادق نے اس موقع پر کہا کہ آج ہم پاکستان کی عظیم بیٹی، محترمہ بینظیر بھٹو شہید کی برسی منا رہے ہیں۔ انہوں نے کہا کہ محترمہ بینظیر بھٹو نے خواتین کے کردار کو مضبوط بنانے میں اہم کردار ادا کیا اور اقلیتوں کے حقوق کے تحفظ کے لیے قابلِ قدر اقدامات کیے۔
اسپیکر قومی اسمبلی نے مزید کہا کہ محترمہ بھٹو نے پاکستان کو ایک پرامن، ترقی پسند اور جمہوری ریاست بنانے میں اہم خدمات سر انجام دیں اور ان کی قربانیاں قوم کے لیے مشعلِ راہ ہیں۔
سردار ایاز صادق نے کہا کہ بینظیر بھٹو شہید نے پاکستان میں رواداری، برداشت، قانون کی حکمرانی اور عوامی فلاح کے سفر کو آگے بڑھایا۔ آخر میں انہوں نے دعا کی کہ اللہ تعالیٰ محترمہ بینظیر بھٹو شہید کو جوارِ رحمت میں اعلیٰ مقام عطا فرمائے۔ آمین۔
