وزیراعظم شہباز شریف نے سابق وزیراعظم محترمہ بینظیر بھٹو شہید کو خراج عقیدت پیش کرتے ہوئے کہا ہے کہ ان کی زندگی اور قربانیاں جمہوریت، عوامی حقوق اور پاکستان کے استحکام کے لیے بے مثال ہیں۔
یہ بھی پڑھیں:بینظیر بھٹو شہید کی برسی کی تقریب، حکومتی وفد کی گڑھی خدا بخش روانگی
اپنے پیغام میں وزیراعظم نے کہا کہ محترمہ بینظیر بھٹو نے سیاسی عمل میں رواداری اور حب الوطنی کو فروغ دیا، جو ان کی سیاسی میراث کا قابلِ فخر حصہ ہے۔ انہوں نے خواتین کے کردار کو مضبوط بنانے اور اقلیتوں کے حقوق کے تحفظ کے لیے بھی قابلِ ذکر اقدامات کیے۔
شہباز شریف نے مزید کہا کہ بینظیر بھٹو نے پاکستان کو ایک پُرامن، ترقی پسند اور جمہوری ریاست بنانے میں اہم کردار ادا کیا، اور ان کی قربانیاں قوم کے لیے مشعلِ راہ ہیں۔ انہوں نے عزم کا اعادہ کیا کہ ملک میں رواداری، برداشت، قانون کی حکمرانی اور عوامی فلاح کے سفر کو جاری رکھا جائے گا۔
وزیراعظم نے دعا کی کہ اللّٰہ تعالیٰ محترمہ بینظیر بھٹو کو جوارِ رحمت میں اعلیٰ مقام عطا فرمائے اور ان کے اہلِ خانہ و چاہنے والوں کو صبر جمیل عطا کرے، آمین۔
