پاکستانی شوبز انڈسٹری کی معروف اداکارہ نمرہ شاہد نے بالی ووڈ کی مشہور اداکارہ کاجول کے ساتھ اپنے موازنے پر اپنی رائے کا اظہار کر دیا۔
حال ہی میں نمرہ شاہد نے نادیہ خان کے مارننگ شو میں شرکت کی جہاں انہوں نے اس موضوع پر گفتگو کی۔ نمرہ شاہد کا کہنا تھا کہ ڈرامہ معمہ کے نشر ہونے کے بعد متعدد افراد انہیں کاجول سے مشابہ قرار دے رہے ہیں۔ انہوں نے کہا کہ وہ نہیں جانتیں کہ یہ تعریف کے زمرے میں آتا ہے یا نہیں تاہم ایک اداکار کے لیے پُراثر آنکھوں کا ہونا یقیناً ایک مثبت بات ہے۔
واضح رہے کہ نمرہ شاہد نے 2016 میں شوبز انڈسٹری میں قدم رکھا اور قلیل عرصے میں اپنی باصلاحیت اداکاری کے باعث نمایاں مقام حاصل کیا۔ انہوں نے شاہ رخ کی سالیاں، شدت، بھولی بانو، ڈر خدا سے، رومیو ویڈز ہیر، کھٹی میٹھی لو اسٹوری اور اے مشتِ خاک جیسے کامیاب ڈراموں میں اپنے فن کا لوہا منوایا۔
حال ہی میں ڈرامہ موہرا میں ان کی پرفارمنس کو شائقین کی جانب سے خوب سراہا گیا جبکہ ان دنوں وہ ہم ٹی وی کے مقبول ڈرامہ سیریل معمہ میں آسیہ کے کردار سے ناظرین کی توجہ حاصل کر رہی ہیں۔
