پاک بحریہ کے جہاز راہ نورد، مددگار اور پاکستان میری ٹائم سیکیورٹی ایجنسی کے جہاز کشمیر نے عمان میں واقع پورٹ سلطان قابوس کا دورہ کیا۔
پاک فوج کے شعبہ تعلقات عامہ (آئی ایس پی آر) کے مطابق بندرگاہ پر پہنچنے پر عمانی حکام کی جانب سے جہازوں کا پرتپاک استقبال کیا گیا۔ دورے کے دوران مشن کمانڈر کموڈور عامر اقبال نے کمانڈنگ آفسرز کے ہمراہ عمان کی بحری قیادت سے ملاقاتیں کیں۔
مزید پڑھیں: پاک بحریہ کا زمین سے فضا میں مار کرنے والے ایل وائی 80 میزائل کا کامیاب تجربہ
اس موقع پر مشن کمانڈر نے رائل نیوی آف عمان کے قائم مقام کمانڈر، ڈائریکٹر جنرل آپریشنز اینڈ پلانز، کمانڈر میری ٹائم سیکیورٹی سینٹر، کمانڈر سید بن سلطان نیول بیس اور کمانڈنٹ سلطان قابوس نیول اکیڈمی سے ملاقاتیں کیں۔
ان ملاقاتوں میں باہمی دلچسپی کے امور، بحری افواج کے روابط اور میری ٹائم سیکیورٹی میں تعاون پر تفصیلی تبادلہ خیال کیا گیا۔
رائل نیوی آف عمان کے آفسرز اور مڈ شپ مین نے بھی پاک بحریہ کے جہازوں کا دورہ کیا اور افسران کے ساتھ مشترکہ دلچسپی کے موضوعات پر گفت و شنید کی۔
بندرگاہی قیام کے دوران عمان کے عسکری حکام اور عام شہریوں نے بھی پاک بحریہ کے جہازوں کا وزٹ کیا، جس میں بڑی تعداد پاکستانی کمیونٹی اور پاکستان اسکول مسقط کے طلبہ کی تھی۔
بندرگاہ کے دورے کے بعد پاک بحریہ اور پاکستان میری ٹائم سیکیورٹی ایجنسی کے جہازوں نے رائل نیوی آف عمان کے جہاز خصب (KHASAB) کے ساتھ سمندری مشقیں کیں۔
اس بحری مشق کا مقصد دونوں ممالک کی بحری افواج کے درمیان تعاون کو فروغ دینا اور مشترکہ بحری مشقوں کے ذریعے تجربات کے تبادلے کو یقینی بنانا تھا۔
مزید پڑھیں: رائل بحرین نیول فورس کے کمانڈر کی بحریہ سربراہ سے ملاقات، دفاعی تعاون کو فروغ دینے کا عزم
پاکستان اور عمان بحری ہمسایہ ہیں، اور دونوں ممالک کے درمیان اعلیٰ حکام کے دورے، بحری جہازوں کی پورٹ کالز اور مشترکہ مشقیں باقاعدگی سے منعقد ہوتی رہتی ہیں۔
اس دورے سے پاک بحریہ اور پاکستان میری ٹائم سیکیورٹی ایجنسی کے درمیان دوطرفہ تعلقات مزید مستحکم ہوں گے۔
