بھارت میں یومِ جمہوریہ کی تقریبات سے محض ایک ہفتہ قبل سیکیورٹی خدشات میں اضافہ ہو گیا ہے، جہاں انٹیلی جنس اداروں نے دارالحکومت نئی دہلی سمیت متعدد شہروں میں ممکنہ دہشتگرد حملوں کے پیش نظر الرٹ جاری کر دیا ہے۔ بھارتی میڈیا کے مطابق خالصتانی تنظیموں اور بنگلہ دیش میں قائم گروہوں کی جانب سے 26 جنوری سے قبل حملوں کا خدشہ ظاہر کیا جا رہا ہے۔
یہ بھی پڑھیں:خالصتان تحریک نے اب تک کیا حاصل کیا؟
میڈیا رپورٹ کے مطابق بھارتی انٹیلیجنس ذرائع کا کہنا ہے کہ خالصتانی نیٹ ورکس اور بیرونِ ملک سرگرم انتہاپسند عناصر مقامی مجرمانہ گروہوں کو اپنے مقاصد کے لیے استعمال کر رہے ہیں۔
الرٹ میں خبردار کیا گیا ہے کہ پنجاب سے تعلق رکھنے والے بعض گینگسٹرز کو خالصتانی اور دیگر شدت پسند ہینڈلرز کی جانب سے ’فٹ سولجرز‘ کے طور پر استعمال کیا جا رہا ہے، جس سے داخلی سلامتی کو سنگین خطرات لاحق ہیں۔
یہ بھی پڑھیں:خالصتان تحریک اور مودی کا خوف
انٹیلیجنس رپورٹ کے مطابق یہ گینگسٹرز ہریانہ، دہلی نیشنل کیپیٹل ریجن، اتر پردیش اور راجستھان میں سرگرم ہیں اور بتدریج خالصتانی تحریک سے وابستہ عناصر کے ساتھ آپریشنل روابط قائم کر رہے ہیں۔
ممکنہ خطرات کے پیش نظر نئی دہلی اور ملک کے دیگر اہم شہروں میں سیکیورٹی مزید سخت کر دی گئی ہے، جبکہ حساس مقامات پر نگرانی بڑھا دی گئی ہے۔ بھارتی حکام کے مطابق یومِ جمہوریہ کی تقریبات کے دوران کسی بھی ناخوشگوار واقعے سے نمٹنے کے لیے تمام اداروں کو چوکس رہنے کی ہدایت جاری کر دی گئی ہے۔
