سعودی عرب کے شہر حائل نے آف روڈ پروڈکشن گاڑیوں کے سب سے بڑے قافلے کا گنیز ورلڈ ریکارڈ قائم کرلیا۔ ہفتے کے روز 501 گاڑیوں پر مشتمل قافلہ تووارن کے صحرائی علاقے میں 7 کلومیٹر طویل غیر ہموار راستے سے گزرا، جس کے ذریعے آسٹریلیا کا 449 گاڑیوں کا سابقہ ریکارڈ توڑ دیا گیا۔
مزید پڑھیں: سعودی عرب میں ساحلی سیاحت کے فروغ کے لیے نئے قوانین نافذ
اس ایونٹ میں مملکت کے مختلف علاقوں کے علاوہ خلیجی اور عرب ممالک سے تعلق رکھنے والے شرکا نے شرکت کی۔ تجربہ کار آف روڈ ڈرائیورز کے ساتھ ساتھ نئے شرکا، خاندانوں اور دوستوں کے گروپس نے بھی اس منفرد سرمائی تفریح میں حصہ لیا، جبکہ ثقافتی اور تفریحی سرگرمیوں نے تقریب کو مزید دلکش بنا دیا۔
مزید پڑھیں: سعودی عرب کو عالمی سیاحتی مرکز بنانے کی جانب اہم قدم، تشہیر کے لیے خصوصی طیارہ متعارف
حائل کے گورنر شہزادہ عبدالعزیز بن سعد بن عبدالعزیز نے اس کامیابی کو قومی اعزاز قرار دیتے ہوئے سعودی قیادت کے تعاون کو سراہا۔ حائل ریجن ڈویلپمنٹ اتھارٹی کے سی ای او عمر عبداللہ الجبار کے مطابق یہ ریکارڈ حائل کو صحرائی سیاحت اور مہم جوئی کی سرگرمیوں کے ایک نمایاں مرکز کے طور پر مزید مستحکم کرتا ہے۔
