پاکستان اور بنگلہ دیش نے دوطرفہ تعلقات کو مزید فروغ دینے اور مختلف شعبوں میں تعاون بڑھانے کے عزم کا اعادہ کیا ہے۔ اس پیش رفت کا اظہار نائب وزیراعظم اور وزیر خارجہ سینیٹر محمد اسحاق ڈار اور بنگلہ دیش کے فارن ایڈوائزر ڈاکٹر محمد توحید حسین کے درمیان ہونے والی ٹیلیفونک گفتگو میں کیا گیا۔
یہ بھی پڑھیں:اسحاق ڈار کی تھائی لینڈ کے وزیر خارجہ سے ملاقات، باہمی تعاون بڑھانے کے عزم کا اعادہ
نائب وزیراعظم و وزیر خارجہ سینیٹر محمد اسحاق ڈار نے بنگلہ دیش کے فارن ایڈوائزر ڈاکٹر محمد توحید حسین سے ٹیلیفون پر بات چیت کی، جس میں پاکستان اور بنگلہ دیش کے درمیان دوطرفہ تعلقات کا تفصیلی جائزہ لیا گیا۔
گفتگو کے دوران دونوں رہنماؤں نے تجارت، معاشی تعاون اور دیگر اہم شعبوں میں اشتراک بڑھانے پر تبادلہ خیال کیا اور اس عزم کا اظہار کیا کہ باہمی تعاون کو مزید وسعت دی جائے گی۔
اس موقع پر علاقائی اور عالمی صورتحال پر بھی خیالات کا تبادلہ ہوا، جبکہ اس بات پر زور دیا گیا کہ مسلسل رابطہ اور مشاورت مشترکہ مفادات کے فروغ، علاقائی امن اور خوشحالی کے لیے ناگزیر ہے۔ دونوں جانب سے اس امر پر اتفاق کیا گیا کہ پاکستان اور بنگلہ دیش کے تعلقات کو نئی جہت دینے کے لیے رابطوں کا سلسلہ جاری رکھا جائے گا۔
