مشہور ٹک ٹاک اور سوشل میڈیا اسٹار علینہ عامر نے حال ہی میں مبینہ نازیبا لیک ویڈیو کے حوالے سے اپنا ردعمل دیتے ہوئے اسے ڈیپ فیک ویڈیو قرار دیا۔ انہوں نے وزیراعلیٰ پنجاب مریم نواز سے بھی اس معاملے پر فوری کارروائی کا مطالبہ کیا۔
علینہ عامر نے اپنی ویڈیو میں کہا کہ ’میں اس موضوع پر بات نہیں کرنا چاہتی تھی اور اسے نظرانداز کر رہی تھی، اور خود کو پریشان محسوس نہیں کر رہی تھی لیکن جب سینکڑوں پوسٹس میں یہ دعویٰ دیکھا کہ میری ویڈیو لیک ہوگئی ہے تو میں نے فیصلہ کیا کہ ایسے لوگوں کو جواب دینا ضروری ہے‘۔
View this post on Instagram
انہوں نے مزید کہا کہ ایسے لوگوں کا ذہن حیران کن ہے جو کسی کو بدنام کرنے کے لیے کسی بھی حد تک جا سکتے ہیں۔ کم از کم تحقیق تو کریں کہ جو ویڈیو آپ شیئر کر رہے ہیں وہ اصل ہے یا نہیں۔
علینہ عامر نے اس معاملے میں وزیراعلیٰ پنجاب مریم نواز سے درخواست کی کہ وہ اس معاملے کو سنجیدگی سے لیں اور لڑکیوں کی ڈیپ فیک یا اے آئی ویڈیوز بنانے والوں کے خلاف سخت کارروائی کی جائے۔
آخر میں علینہ عامر نے اعلان کیا کہ جو بھی انہیں فیک ویڈیو بنانے والے کے بارے میں معلومات فراہم کرے گا اسے کیش پرائز دیا جائے گا۔
