عازمینِ حج 2026 کے لیے اہم ہدایت جاری کرتے ہوئے وزارتِ مذہبی امور نے سعودی ویزا بائیو میٹرک کی تاریخ میں توسیع کا اعلان کر دیا ہے۔
ترجمان وزارتِ مذہبی امور کے مطابق سعودی ویزہ بائیو میٹرک مکمل کروانے کی نئی حتمی ڈیڈ لائن 17 فروری مقرر کی گئی ہے۔ مقررہ تاریخ تک بائیو میٹرک مکمل نہ کرنے والے عازمین کو حج ویزہ جاری نہیں کیا جائے گا، کیونکہ بائیو میٹرک حج ویزہ کے حصول کے لیے لازمی شرط قرار دی گئی ہے۔
یہ بھی پڑھیے: رمضان سے قبل سعودی وزیر صحت کا مدینہ شہر کا دورہ، طبی مراکز کی تیاریوں کا جائزہ
ترجمان نے بتایا کہ عازمینِ حج سعودی ویزہ بائیو میٹرک موبائل ایپ کے ذریعے گھر بیٹھے بھی اپنا بائیو میٹرک مکمل کر سکتے ہیں، جس سے انہیں سہولت میسر آئے گی اور غیر ضروری سفر سے بچا جا سکے گا۔
اس کے علاوہ ملک کے چھ بڑے شہروں میں قائم سعودی تاشیرہ سینٹرز پر جا کر بھی بائیو میٹرک کروانے کی سہولت دستیاب ہے۔
یہ بھی پڑھیے: حج کے لیے ویزوں کا اجرا کب شروع ہوگا؟ سعودی عرب نے اعلان کردیا
وزارتِ مذہبی امور نے عازمین کو ہدایت کی ہے کہ تاشیرہ سینٹرز سے بائیو میٹرک مکمل کروانے کے بعد ملنے والی رسید یا تصدیقی ای میل اپنے پاس محفوظ رکھیں تاکہ کسی بھی مرحلے پر ضرورت پڑنے پر پیش کی جا سکے۔
حکام نے تمام عازمین سے اپیل کی ہے کہ وہ مقررہ تاریخ سے قبل بائیو میٹرک کا عمل مکمل کر کے اپنے حج ویزہ کے اجرا کو یقینی بنائیں۔
