پاکستان اسٹاک ایکسچینج میں آج ابتدائی کاروباری اوقات میں مثبت رجحان غالب رہا، جہاں بینچ مارک کے ایس ای 100 انڈیکس نے انٹرا ڈے ٹریڈنگ کے دوران 500 سے زائد پوائنٹس کا اضافہ ریکارڈ کیا۔
دوپہر 12 بجے کے ایس ای 100 انڈیکس 182,876.49 پوائنٹس پر ٹریڈ کر رہا تھا، جو 536.11 پوائنٹس یعنی 0.29 فیصد اضافے کو ظاہر کرتا ہے۔
یہ بھی پڑھیں: اسٹاک مارکیٹ بلند ترین سطح پر پہنچ کر مندی سے دوچار، کیا معیشت خطرے میں ہے؟
مارکیٹ میں خریداری کا دباؤ نمایاں رہا، خاص طور پر آٹو موبائل اسمبلرز، سیمنٹ، فرٹیلائزر، تیل و گیس کی تلاش و پیداوار کرنے والی کمپنیاں، آئل مارکیٹنگ کمپنیاں، پاور جنریشن اور ریفائنری سیکٹرز میں سرگرمی دیکھی گئی۔
انڈیکس پر اثر انداز ہونے والے بڑے شیئرز بشمول حبکو، ماری، پول، پی ایس او، ایس ایس جی سی، ایس این جی پی ایل، ایم سی بی اور یو بی ایل سبز زون میں ٹریڈ کرتے رہے۔
Market is up at midday 🚀
⏳ KSE 100 is positive by +536.11 points (+0.29%) at midday trading. Index is at 182,876.5 and volume so far is 189.2 million shares (12:00 PM) pic.twitter.com/c9X1GHebOW— Investify Pakistan (@investifypk) February 10, 2026
گزشتہ روز یعنی پیر کو پاکستان اسٹاک ایکسچینج دباؤ کا شکار رہی، جہاں مسلسل ادارہ جاتی فروخت، بڑے شیئرز میں کمزوری اور تکنیکی ایڈجسٹمنٹ کے باعث مارکیٹ میں مندی دیکھنے میں آئی۔
کے ایس ای 100 انڈیکس 1,789.20 پوائنٹس یعنی 0.97 فیصد کمی کے بعد 182,340.38 پوائنٹس پر بند ہوا تھا۔
دوسری جانب، اسٹیٹ بینک نے پیر کے روز کہا کہ اگرچہ معیشت میں بہتری کے واضح آثار موجود ہیں، تاہم پاکستان کا معاشی منظرنامہ اب بھی اندرونی اور بیرونی خطرات سے دوچار ہے۔
مزید پڑھیں: مثبت آغاز کے بعد اسٹاک ایکسچینج مندی سے دوچار، انڈیکس 600 پوائنٹس گرگیا
مرکزی بینک نے پالیسی میں تسلسل اور گہرے ساختی اصلاحات کی ضرورت پر زور دیا۔
عالمی سطح پر ایشیائی اسٹاک مارکیٹس میں بھی دوسرے روز تیزی دیکھی گئی۔ جاپان کے وزیرِاعظم سانائے تاکائیچی کی حالیہ انتخابی کامیابی کے بعد ٹوکیو کی مارکیٹ میں زبردست تیزی جاری رہی۔
جاپان کا نکی 225 انڈیکس 2.8 فیصد اضافے کے ساتھ مسلسل تیسرے روز نئی بلند ترین سطح پر پہنچ گیا، جبکہ ین بھی دوسرے روز مضبوط رہا۔
ایم ایس سی آئی کا جاپان کے علاوہ ایشیا پیسفک شیئرز پر مشتمل انڈیکس 0.7 فیصد بڑھ گیا۔
امریکا میں، دو روزہ تیزی کے بعد امریکی ایکویٹی فیوچرزمیں معمولی ٹھنڈک دیکھنے میں آئی، ایس اینڈ پی 500 ای-منی فیوچرز 0.1 فیصد نیچے آئے۔
تاہم پیر کو وال اسٹریٹ میں ایس اینڈ پی 500 میں 0.5 فیصد اور نیسڈیک کمپوزٹ میں 0.9 فیصد اضافہ ہوا تھا، جہاں ٹیکنالوجی شیئرز نے گزشتہ ہفتے کی اے آئی سے جڑی فروخت کے بعد دوبارہ سنبھالا لیا۔
مزید پڑھیں: اسٹاک مارکیٹ بلند ترین سطح پر پہنچ کر مندی سے دوچار، کیا معیشت خطرے میں ہے؟
اسی دوران، وائٹ ہاؤس کے معاشی مشیر کیون ہاسیٹ نے کہا ہے کہ آنے والے مہینوں میں امریکا میں ملازمتوں میں اضافے کی رفتار سست ہو سکتی ہے۔
ٹرمپ انتظامیہ کی امیگریشن پالیسیوں سے لیبر گروتھ متاثر ہو رہی ہے، جبکہ نئی اے آئی ٹیکنالوجیز پیداوار میں اضافہ کر رہی ہیں۔
