پاکستانی فلم انڈسٹری کے معروف اداکار فہد مصطفیٰ اور ماہرہ خان کی نئی فلم ’آگ لگے بستی میں‘ کے ٹریلر نے ریلیز ہوتے ہی شائقین کی بھرپور توجہ حاصل کرلی ہے اور سوشل میڈیا پر بھی خاصی پذیرائی مل رہی ہے۔
اے آر وائی فلمز کے بینر تلے بننے والی اس فلم میں فہد مصطفیٰ، ماہرہ خان، جاوید شیخ اور تابش ہاشمی اہم اور منفرد کرداروں میں جلوہ گر ہوں گے۔ فلم کی ہدایت کاری بلال عاطف خان نے انجام دی ہے جبکہ کہانی بھی انہی کی تحریر کردہ ہے۔
ٹریلر میں فہد مصطفیٰ کو ایک ایسے کردار میں دکھایا گیا ہے جو ایمانداری کے اصولوں پر سختی سے کاربند ہے اور یہ کہتے نظر آتے ہیں کہ وہ مر تو سکتے ہیں لیکن چوری کا ایک نوالہ بھی قبول نہیں کریں گے۔ اس کے برعکس ماہرہ خان دولت کی جلد حصول کی خواہشمند دکھائی دیتی ہیں اور فہد مصطفیٰ کے کردار کو غلط راستہ اختیار کرنے پر آمادہ کرنے کی کوشش کرتی ہیں۔ ٹریلر میں آگے چل کر کہانی ایک سنسنی خیز رخ اختیار کر لیتی ہے جہاں قتل و غارت اور شدید تنازعات کا سلسلہ شروع ہو جاتا ہے۔
یہ بھی پڑھیں: ماہرہ خان بھی ’اچھا جی ایسا ہے کیا‘ میم ٹرینڈ میں شامل، ویڈیو وائرل
فلم میں سوشل میڈیا پر غیر معمولی مقبولیت حاصل کرنے والی ثمرہ شہزادی بھی شامل ہیں، جو اس فلم کے ذریعے مین اسٹریم سینما میں قدم رکھ رہی ہیں۔ ’آگ لگے بستی میں‘ ان کی پہلی فلم ہے جس کے ذریعے وہ سلور اسکرین پر ڈیبیو کر رہی ہیں۔
ثمرہ شہزادی نے فلم کے ٹریلر لانچ ایونٹ میں شرکت کی جہاں وہ خاصی پرجوش دکھائی دیں۔ اس موقع پر گفتگو کرتے ہوئے انہوں نے کہا کہ وہ اس لمحے خود کو خوشی سے فضا میں اڑتا ہوا محسوس کر رہی ہیں۔
واضح رہے کہ سلمان اقبال فلمز اور بگ بینگ فلمز کی مشترکہ پیشکش ’آگ لگے بستی میں‘ رواں سال عیدالفطر کے موقع پر ملک بھر کے سینما گھروں میں نمائش کے لیے پیش کی جائے گی۔
