کینیڈا کے صوبے برٹش کولمبیا کے قصبے ٹمبلر رج میں واقع ایک ہائی اسکول میں فائرنگ کے واقعے میں مبینہ حملہ آور سمیت 10 افراد ہلاک جبکہ متعدد زخمی ہوگئے۔ رائل کینیڈین ماؤنٹڈ پولیس (RCMP) کے مطابق واقعہ منگل کے روز پیش آیا۔
پولیس کا کہنا ہے کہ ٹمبلر رج سیکنڈری اسکول کے اندر 6 افراد مردہ پائے گئے، جبکہ ایک زخمی شخص اسپتال منتقل کرتے ہوئے راستے میں دم توڑ گیا۔ مزید 2 افراد کی لاشیں ایک قریبی گھر سے ملیں جن کے بارے میں شبہ ہے کہ ان کا تعلق بھی اسی واقعے سے ہے۔
مزید پڑھیں: ٹی 20 ورلڈ کپ 2026: جنوبی افریقہ نے کینیڈا کو 57 رنز سے شکست دے دی
آر سی ایم پی کے مطابق ایک شخص، جسے حملہ آور سمجھا جا رہا ہے، مردہ پایا گیا اور بظاہر اس کی موت خود کو گولی مارنے سے ہوئی۔ ابتدائی الرٹ میں مشتبہ شخص کو بھورے بالوں والی خاتون قرار دیا گیا تھا جو لباس پہنے ہوئے تھی، تاہم پولیس واقعے کی مکمل تحقیقات کر رہی ہے اور یہ بھی دیکھا جا رہا ہے کہ آیا کوئی دوسرا مشتبہ شخص بھی ملوث تھا یا نہیں۔
BREAKING: Mass shooting at British Columbia high school leaves 10 dead, including suspect
Police say six victims were found inside Tumbler Ridge Secondary School, with others discovered at a linked home; the gunman died from a self-inflicted injury as dozens more were treated… pic.twitter.com/2jSFpd3fKj
— Catch Up (@CatchUpFeed) February 11, 2026
پولیس کے مطابق 2 زخمیوں کو شدید حالت میں ایئر ایمبولینس کے ذریعے اسپتال منتقل کیا گیا، جبکہ قریباً 25 افراد کو مقامی طبی مرکز میں معمولی زخمی حالت میں طبی امداد دی جا رہی ہے۔
حکام کا کہنا ہے کہ اسکول کے تمام دیگر طلبا اور عملے کو بحفاظت نکال لیا گیا ہے اور خاندانوں کو طلبا سے ملانے کے لیے مربوط عمل جاری ہے۔ قصبے کے رہائشیوں کو ہدایت کی گئی ہے کہ وہ اپنے گھروں میں رہیں کیونکہ پڑوسی علاقوں سے اضافی پولیس نفری تعینات کی جا رہی ہے۔
پیِس ریور ساؤتھ کے رکنِ اسمبلی لیری نیوفیلڈ نے میڈیا سے گفتگو میں کہا کہ آر سی ایم پی اور ایمبولینس سمیت اضافی وسائل علاقے میں بھیجے گئے ہیں۔ انہوں نے عوام سے اپیل کی کہ وہ اپنے گھروں میں رہیں اور سیکیورٹی اداروں کو صورتحال قابو میں لانے کا موقع دیں۔
مزید پڑھیں: کینیڈا کی معروف اداکارہ کیتھرین او ہارا 71 برس کی عمر میں چل بسیں
برٹش کولمبیا کے وزیرِاعلیٰ ڈیوڈ ایبی نے واقعے کو ’ناقابلِ تصور سانحہ‘ قرار دیتے ہوئے متاثرہ خاندانوں سے اظہارِ ہمدردی کیا اور یقین دلایا کہ حکومت کمیونٹی کو ہر ممکن مدد فراہم کرے گی۔
واضح رہے کہ ٹمبلر رج کی آبادی قریباً 3 ہزار سے کم ہے اور مذکورہ سیکنڈری اسکول میں جماعت ہفتم سے 12ویں تک کے قریباً 175 طلبا زیرِ تعلیم ہیں۔
