مدینہ بس منصوبے کے تحت آج سے 8 شٹل بس روٹس کا آغاز کر دیا گیا ہے تاکہ نمازیوں اور زائرین کو مسجد نبوی صلی اللہ علیہ وسلم اور مسجد قباء تک آمد و رفت میں سہولت فراہم کی جا سکے۔ سروس کا آغاز آج سے ہوگا اور یہ تراویح کی نماز کے ایک گھنٹے بعد تک جاری رہے گی۔
یہ بھی پڑھیں: سعودی عرب میں رمضان المبارک کا چاند نظر آگیا، 18 فروری بروز بدھ پہلا روزہ ہوگا
یہ منصوبہ مدینہ ریجن ڈیولپمنٹ اتھارٹی کی نگرانی میں چلایا جا رہا ہے۔ انتظامیہ کے مطابق 8 مخصوص روٹس مقرر کیے گئے ہیں جو مدینہ کے مختلف علاقوں سے براہ راست مسجد نبویؐ تک رسائی فراہم کریں گے۔ ان علاقوں میں الخالدیہ ڈسٹرکٹ، کنگ فہد ڈسٹرکٹ، حرمین ہائی اسپیڈ ریلوے اسٹیشن، شظہ ڈسٹرکٹ، سید الشہداء، السلام کالج، اسپورٹس اسٹیڈیم اور پارک شامل ہیں۔
اس کے علاوہ العالیہ اسٹیشن کو مسجد قباء کے لیے براہ راست اسٹاپ مقرر کیا گیا ہے جہاں سے بسوں کا آغاز سہ پہر 3 بجے ہوگا۔
مزید پڑھیے: مسجد الحرام میں خواتین عبادت گزاروں کے لیے مثالی سہولیات میں اضافہ
حکام کے مطابق اس سروس کا مقصد ٹریفک کے دباؤ میں کمی لانا، زائرین اور نمازیوں کو بہتر سہولت فراہم کرنا اور رمضان المبارک کے دوران عبادات کو آرام اور سکون کے ساتھ ادا کرنے میں مدد دینا ہے۔
