شمال مشرقی مصر کے پورٹ سعید گورنریٹ میں ایک بھاری ٹرک اور پِک اپ گاڑی کے درمیان شدید تصادم کے نتیجے میں کم از کم 18 افراد جاں بحق اور 3 زخمی ہوگئے۔ حکام کے مطابق یہ حادثہ مقامی وقت کے مطابق دوپہر 12:30 بجے کے تیس جون کے قریب ایکسپریس وے پر پیش آیا۔
یہ بھی پڑھیں: چاغی: ریکوڈک پروجیکٹ سائٹ روڈ پر خوفناک ٹریفک حادثہ، 11 افراد جاں بحق، 6 زخمی
ابتدائی اطلاعات کے مطابق جاں بحق ہونے والوں میں زیادہ تر ماہی گیر شامل تھے جو ساحلی علاقے میں مچھلی فارموں پر کام کے لیے جا رہے تھے۔ زخمیوں کو فوری طور پر قریبی ہسپتال منتقل کر کے طبی امداد فراہم کی گئی ہے۔
حادثے کے فوری بعد پورٹ سعید کے گورنر اور متعلقہ افسران جائے حادثہ پر پہنچ گئے اور صورتحال کا جائزہ لیا۔ مصر کے وزیر اعظم نے جاں بحق افراد کے لواحقین سے تعزیت کا اظہار کیا اور زخمیوں کے فوری علاج معالجے کی ہدایات دی ہیں۔ انہوں نے متاثرین کے اہل خانہ کے لیے مالی امداد فراہم کرنے کے بھی احکامات جاری کیے۔
یہ بھی پڑھیں: سعودی عرب ٹریفک حادثہ، بونیر سے تعلق رکھنے والے ایک ہی خاندان کے 7 عمرہ زائرین جاں بحق
یہ حادثہ ایسے وقت میں پیش آیا ہے جب مصر کی سڑکوں پر ٹریفک حادثات معمول بن چکے ہیں اور ہر سال ہزاروں افراد اپنی جانیں کھو دیتے ہیں۔ تیز رفتاری، خراب سڑکیں اور ٹریفک قوانین پر عمل درآمد میں کمی کو ان حادثات کی بنیادی وجوہات قرار دیا جاتا ہے۔
اس سے قبل جون کے مہینے میں بھی ایک ٹرک اور مائیکروبس کے درمیان تصادم میں 19 افرادجاں بحق ہوچکے ہیں، جن میں زیادہ تر نوجوان لڑکیاں شامل تھیں۔ یہ واقعہ مصر میں سڑکوں کی حفاظت اور ٹریفک قوانین پر عمل درآمد کے حوالے سے جاری تشویش کو ایک بار پھر اجاگر کرتا ہے۔
