معروف ہدایت کار سریرام راغوان نے اپنی حالیہ فلم ’اکیس‘ میں دکھائے گئے پاکستان مخالف مواد کے حوالے سے پیدا ہونے والے تنازعے پر وضاحت پیش کی ہے۔
فلم میں ایک پاکستانی مخالف نوٹ شامل کیا گیا تھا جس پر ناظرین نے سوشل میڈیا پر شدید ردعمل کا اظہار کیا جس پر وضاحت پیش کرتے ہوئے سریرام راغوان نے کہا کہ بہت سے لوگوں نے مجھ سے اس بارے میں سوال کیا ہے، لیکن میں نے فیصلہ کیا ہے کہ اس پر بات نہیں کروں گا۔ کچھ فیصلے میرے اختیار سے باہر تھے۔
یہ بھی پڑھیں: ’پاکستان میری موسی ماں ہے‘، بالی ووڈ کے لیجنڈ دھرمیندر کا پاکستان کے لیے محبت بھرا پیغام وائرل
انہوں نے واضح کیا کہ وہ ذاتی طور پر پاکستان مخالف ڈسکلیمر شامل کرنے کے حق میں نہیں تھے۔ یہ فیصلہ پروڈیوسر کی جانب سے کیا گیا۔ انہوں نے مزید کہا کہ ’اکیس‘ کے پروڈیوسر دینش وجن نے مجھے فلم بنانے میں مکمل آزادی دی تھی تاہم پاکستان مخالف ڈسکلیمرشامل کرنے میں میری رضامندی شامل نہ تھی۔
واضح رہے کہ فلم ’اکیس‘ ارون کھیترپل کی زندگی پر مبنی بایوگرافیکل وار ڈرامہ ہے جو 1971 کی بھارت پاکستان جنگ کے دوران باسنتر کی لڑائی کے پس منظر میں بنائی گئی۔
