ڈیموکریٹ امیدوار ڈاکٹر آدم حموی نے امریکی ریاست نیو جرسی کے 12ویں کانگریشنل ڈسٹرکٹ سے ریپبلکن امیدوار گریگ میل کو شکست دے کر کامیابی حاصل کر لی ہے۔
انتخابی نتائج کے ابتدائی تخمینوں کے مطابق وہ نیو جرسی سے امریکی کانگریس کے ایوانِ نمائندگان کے لیے منتخب ہونے والے پہلے مسلمان بن گئے ہیں۔
یہ بھی پڑھیں: امریکی وسط مدتی انتخابات: ڈیموکریٹس نے کانگریس کے دونوں ایوانوں کا کنٹرول حاصل کرلیا
پلاسٹک سرجن، سابق امریکی فوجی ڈاکٹر اور انسانی ہمدردی کی بنیاد پر طبی خدمات انجام دینے والے 56 سالہ ڈاکٹر آدم حموی اب ڈیموکریٹ رکنِ کانگریس بونی واٹسن کولمین کی جگہ لیں گے، جو ایوانِ نمائندگان میں ایک دہائی گزارنے کے بعد ریٹائر ہو رہی ہیں۔
حموی کی انتخابی مہم کا محور صحت عامہ، اسرائیل کو امریکی فوجی امداد، امیگریشن قوانین کے نفاذ اور معاشی مسائل جیسے اہم موضوعات تھے۔
Adam Hamawy, the surgeon who volunteered in Gaza, has won New Jersey’s 12th congressional district. He’ll make history as the state’s first Muslim and Egyptian-American congressman. A campaign centred on Palestine, healthcare and economic inequality now heads to Washington. pic.twitter.com/jouNXO5nWs
— Middle East Eye (@MiddleEastEye) November 4, 2026
ان کی کامیابی کو سیاسی میدان میں ایک اہم پیشرفت قرار دیا جا رہا ہے، خصوصاً اس لیے کہ غزہ میں ان کی انسانی ہمدردی کی بنیاد پر طبی خدمات نے انہیں قومی سطح پر شہرت دلائی۔
فوجی ڈاکٹر سے انسانی ہمدردی کے کارکن تک کا سفر
مصر میں پیدا ہونے والے اور امریکا میں پرورش پانے والے آدم حموی نے عراق جنگ کے دوران امریکی فوج میں بطور جنگی معالج خدمات انجام دیں۔ فوجی خدمات کے بعد انہوں نے تنازعات سے متاثرہ علاقوں میں طبی امداد فراہم کرنے کا سلسلہ شروع کیا۔
انہوں نے بوسنیا، سوڈان، لبنان اور شام سمیت مختلف ممالک میں طبی مشنز میں حصہ لیا اور جنگ زدہ علاقوں میں متاثرہ افراد کو طبی سہولیات فراہم کیں۔
2024 میں اسرائیل کی جانب سے غزہ پر مسلط جنگ کے دوران حموی انسانی ہمدردی کی بنیاد پر طبی خدمات فراہم کرنے کے لیے جنوبی غزہ پہنچے، غزہ میں ان کا تجربہ ان کی سیاسی زندگی میں عملی طور پر ایک اہم موڑ ثابت ہوا۔
مزید پڑھیں: امیگریشن فراڈ تحقیقات کے باوجود الہان عمر پانچویں بار امریکی کانگریس کی رکن منتخب
حموی اس وقت عالمی توجہ کا مرکز بنے جب 2024 میں اسرائیل کی جانب سے رفح سرحدی گزرگاہ بند کیے جانے کے بعد وہ دیگر ڈاکٹروں کے ہمراہ غزہ میں پھنس گئے تھے۔
اس موقع پر امریکی سینیٹر ٹیمی ڈک ورتھ نے ان کے انخلا کے لیے کردار ادا کیا، دلچسپ امر یہ ہے کہ حموی نے اس سے قبل 2004 میں عراق کے اندر ایک ہیلی کاپٹر پر حملے کے بعد ٹیمی ڈک ورتھ کی جان بچائی تھی۔
غزہ کا تجربہ انتخابی مہم کا اہم حصہ بن گیا
غزہ میں انسانی بحران اور وہاں اپنی طبی خدمات کے تجربے کو آدم حموی نے اپنی سیاسی شناخت اور انتخابی مہم کا بنیادی حصہ بنایا۔
اسرائیل کی فوجی کارروائیوں کے لیے امریکی حمایت کے سخت ناقد حموی نے اسرائیل کو امریکی فوجی امداد بند کرنے کا مطالبہ کیا اور اسے اپنے انتخابی منشور میں نمایاں جگہ دی۔
اس کے علاوہ انہوں نے تمام شہریوں کے لیے سرکاری طبی سہولت کی فراہمی، طبی اور تعلیمی قرضوں کی منسوخی اور امیگریشن اینڈ کسٹمز انفورسمنٹ کے خاتمے کی حمایت بھی کی۔
مزید پڑھیں: اختلافات کے باوجود برطانیہ اور امریکا جمہوریت کے دفاع میں متحد رہیں گے، کنگ چارلس کا امریکی کانگریس سے خطاب
حموی نے رواں سال ڈیموکریٹک پارٹی کے سخت مقابلے پر مشتمل ابتدائی انتخاب میں کامیابی حاصل کی۔ وہ پہلی مرتبہ سیاسی میدان میں اترے تھے اور ان کی انتخابی مہم میں صحت عامہ، انسانی حقوق اور خارجہ پالیسی کو مرکزی اہمیت حاصل رہی۔
ابتدائی انتخاب میں کامیابی کے بعد اپنے حامیوں سے خطاب کرتے ہوئے انہوں نے کہا تھا کہ ہم نے یہ واضح کر دیا ہے کہ انصاف کے لیے جدوجہد کرنے کی خاطر کسی سے اجازت لینے کی ضرورت نہیں۔
بونی واٹسن کولمین کی جگہ لیں گے
آدم حموی نیو جرسی کے 12ویں کانگریشنل ڈسٹرکٹ کی نمائندگی بونی واٹسن کولمین سے حاصل کریں گے، جو ڈیموکریٹک پارٹی کی ایک بااثر ترقی پسند رہنما ہیں اور کانگریس میں 10 سال خدمات انجام دینے کے بعد عہدہ چھوڑ رہی ہیں۔
واٹسن کولمین نے 2024 کے انتخابات میں اپنے حریف کو 25 فیصد پوائنٹس کے واضح فرق سے شکست دی تھی، جو اس حلقے میں ڈیموکریٹک پارٹی کی مضبوط سیاسی پوزیشن کا مظہر ہے۔
مزید پڑھیں: امریکا اور ایران کے درمیان ثالثی پر پاکستان کی تعریف، امریکی کانگریس میں قرارداد پیش
انتخابی نتائج پر نظر رکھنے والے ادارے ’ڈیسیژن ڈیسک ایچ کیو‘ نے آدم حموی کی گریگ میل کے خلاف کامیابی کی پیشگوئی کی ہے، جس کے نتیجے میں ڈیموکریٹس یہ نشست برقرار رکھنے میں کامیاب رہے ہیں۔
آدم حموی کی کامیابی سے امریکی کانگریس میں مسلمانوں کی نمائندگی میں مزید اضافہ ہوگا، انتخابی تخمینوں کے مطابق وہ نیو جرسی سے امریکی ایوانِ نمائندگان کے لیے منتخب ہونے والے پہلے مسلمان رکن ہیں۔
