قومی کرکٹ ٹیم نے ایشیا کپ کے فائنل سمیت بھارت کے خلاف تین میچز میں شکست کے بعد اب ٹی ٹوئنٹی ورلڈکپ 2026 میں بھی مایوس کن کارکردگی دکھائی ہے۔ بھارت کے ہاتھوں ٹی ٹوئنٹی ورلڈکپ میں شکست کے بعد شائقین کی جانب سے قومی ٹیم کی کارکردگی پر شدید ردِعمل سامنے آیا اور صارفین نے ٹیم میں بڑی تبدیلیوں کا مطالبہ کیا۔
خاص طور پر صارفین نے کہا کہ بابر اعظم کو ٹیم سے خارج کیا جائے کیونکہ وہ گزشتہ کئی عرصے سے متوقع کارکردگی پیش کرنے میں ناکام رہے ہیں۔ ایسے ہی ایک مداح نے نجی ٹی وی کی رمضان ٹرانسمیشن میں بابر اعظم کو ٹیم سے نکالنے کا وظیفہ پوچھ لیا۔
بابر اعظم کی پرفارمنس سے شائقین کرکٹ اس قدر مایوس ہیں کہ وہ اب مولویوں سے وظیفہ پوچھ رہے ہیں کہ بابر اعظم کو ٹیم سے نکالنے کا وظیفہ کیا ہے@iamamirofficial
— Muhammad Faizan Aslam Khan (@FaizanBinAslam1) February 23, 2026
کالر کے سوال پر میزبان جویریہ سعود نے کہا کہ آج کل تو ہر شخص یہی سوچ رہا ہے کہ کسی طرح اچھے کرکٹرز کو ٹیم میں شامل کیا جائے۔ جو کھلاڑی کارکردگی نہیں دکھائے گا اس کے لیے ٹیم سے نکالنا ضروری ہوگا۔
مولانا آزاد جمیل نے کالر کے سوال کا جواب دیتے ہوئے کہا کہ جب آپ میدان میں چھکا لگاتے ہیں تو لوگ گھروں میں بیٹھ کر تالیاں بجاتے ہیں۔ آپ کو دیکھ کر لوگ گلیوں میں کرکٹ کھیلتے ہیں اور آپ کی جیت پوری قوم کی جیت ہوتی ہے۔ سب آپ کی کامیابی کے لیے دعا کرتے ہیں لیکن پرفارمنس بھی لازم ہے۔
یہ بھی پڑھیں: ’رمضان سے پہلے نازیبا ساڑھیاں اور اب سر پر ڈوپٹا؟‘ لائیو کالر کا جویریہ سعود سے سخت سوال
انہوں نے مزید کہا کہ کھیل آپ کی ذمہ داری ہے پڑوسی ملک کے نام پر گھبرانے کی ضرورت نہیں۔ اگر آپ یہاں بلے سے مقابلہ نہیں کر سکتے تو ہماری افواج موجود ہیں۔ جیسے بنیان المرصوص میں افواج نے دشمن کے جہاز گرائے اور قوم یکجا ہوئی، ہماری کرکٹ ٹیم کو بھی تربیت کی ضرورت ہے۔
