اسلام آباد ٹریفک پولیس کے ترجمان نے 2 مارچ 2026 کے لیے ریڈزون سے متعلق ٹریفک ایڈوائزری جاری کر دی ہے، جس میں شہریوں کو متبادل راستے اختیار کرنے کی ہدایت کی گئی ہے۔
ترجمان کے مطابق ریڈزون میں داخلے کے لیے صرف مارگلہ روڈ اور اسلام آباد میریٹ ہوٹل کے راستے کھلے رہیں گے، جبکہ ان کے علاوہ ریڈزون کی جانب جانے والے تمام داخلی راستے بند رہیں گے۔
ایڈوائزری میں کہا گیا ہے کہ کلب روڈ سے آنے والے شہری کشمیر چوک سے سری نگر ہائی وے کے ذریعے سیونتھ ایونیو اور پھر مارگلہ روڈ استعمال کریں۔ اسی طرح بھارہ کہو سے آنے والے شہری بھی کشمیر چوک کے راستے سری نگر ہائی وے، سیونتھ ایونیو اور مارگلہ روڈ اختیار کریں۔
ترجمان نے شہریوں سے اپیل کی ہے کہ وہ غیر ضروری سفر سے گریز کریں اور جاری کردہ ہدایات پر عمل کریں تاکہ ٹریفک کی روانی برقرار رہے۔
مزید معلومات کے لیے شہری پکار 15 اور ٹریفک ہیلپ لائن 1915 پر رابطہ کر سکتے ہیں یا اسلام آباد ٹریفک پولیس FM 92.4 سنتے رہیں۔
