پاکسان ریلوے نے قصور سے پاکپتن کے درمیان چلنے والی بلھے شاہ ایکسپریس کو 28 مئی سے بحال کرنے کا فیصلہ کیا ہے، مذکورہ ٹرین سروس 15 نومبر 2011 سے معطل تھی۔
یہ اعلان وفاقی وزیر برائے ریلوے محمد حنیف عباسی نے وزارتِ ریلوے میں ہونے والے ایک اہم اجلاس کے بعد کیا جس میں اسپیکر پنجاب اسمبلی ملک محمد احمد خان اور وزیر مملکت ملک راشد احمد خان بھی شریک تھے۔
اجلاس میں قصور اور گرد و نواح کے عوام کو درپیش سفری مسائل اور ترقیاتی منصوبوں پر تفصیلی تبادلہ خیال کیا گیا۔
یہ بھی پڑھیں: رمضان المبارک میں ریلوے ریزرویشن دفاتر کے اوقات کار تبدیل
اجلاس کے دوران 257-اپ اور 258-ڈاؤن بلھے شاہ پیسنجر ٹرین کی بحالی کی باضابطہ درخواست پیش کی گئی، جسے وفاقی وزیر ریلوے نے منظور کرتے ہوئے قصور تا پاکپتن بلھے شاہ ایکسپریس کی بحالی کا اعلان کیا۔
بلھے شاہ ایکسپریس کا روٹ قصور، عثمانوالہ، کنگن پور، منڈی احمد آباد، بصیرپور، حویلی وساویوالہ سے ہوتا ہوا پاکپتن تک جاتا ہے۔
وفاقی وزیر محمد حنیف عباسی کا کہنا تھا کہ ٹرین کی بحالی سے مقامی آبادی کو سستی، محفوظ اور قابلِ اعتماد سفری سہولت میسر آئے گی جبکہ علاقائی معاشی سرگرمیوں کو بھی فروغ ملے گا۔
مزید پڑھیں: رمضان المبارک میں ریلوے ریزرویشن دفاتر کے اوقات کار تبدیل
انہوں نے بتایا کہ قصور کے عوام کے لیے ایک بڑے اقدام کے طور پر تحصیل کھڈیاں میں 25 ایکڑ اراضی پر عوامی پارک کے قیام کی بھی منظوری دی گئی ہے۔
یہ منصوبہ وزیراعظم، اسپیکر پنجاب اسمبلی اور وزیر مملکت ملک راشد احمد خان کے حلقہ انتخاب میں قائم کیا جائے گا، جس سے مقامی شہریوں کو تفریحی اور صحت مند سرگرمیوں کے مواقع فراہم ہوں گے۔
مزید پڑھیں: اطالوی سفیر کی گولڑہ ریلوے اسٹیشن آمد، ریلوے حکام کی بریفنگ
مزید برآں، قصور ریلوے اسٹیشن کی خوبصورتی اور اپ گریڈیشن کا بھی اعلان کیا گیا تاکہ مسافروں کو جدید سہولیات فراہم کی جا سکیں۔
اس کے علاوہ کوٹ رادھا کشن میں تیزگام ایکسپریس کے اسٹاپ کی اصولی منظوری بھی دی گئی ہے، جس سے مقامی مسافروں کو براہِ راست سفری سہولت حاصل ہوگی۔
وفاقی وزیر نے اس عزم کا اعادہ کیا کہ پاکستان ریلوے کو جدید خطوط پر استوار کر کے عوام کو بہتر، محفوظ اور معیاری سفری سہولیات فراہم کی جائیں گی۔
