لاہور میں رواں سال کی سب سے بڑی ڈکیتی کی واردات رپورٹ کی گئی ہے۔
شہر کے پوش علاقے ڈیفنس میں نامعلوم ڈاکو ایک گھر سے 19 کروڑ روپے سے زائد مالیت کا سونا، نقدی اور قیمتی سامان لوٹ کر فرار ہوگئے۔
پولیس کے مطابق متاثرہ شہری عامر سعید کی مدعیت میں مقدمہ درج کرکے واقعے کی تفتیش شروع کر دی گئی ہے۔
یہ بھی پڑھیں: پنجاب پولیس نے سال 2025 میں کتنے ہزار منشیات فروش گرفتار کیے؟
ایف آئی آر کے متن کے مطابق واردات اس وقت پیش آئی جب گھر کے مکین سحری کرنے کے بعد واپس اپنے گھر پہنچے۔
اسی دوران گاڑی میں سوار 4 ملزمان موقع دیکھ کر گھر کے اندر داخل ہوگئے۔
ملزمان نے گھر میں داخل ہوتے ہی اہلِ خانہ کو ٹی وی لاؤنج میں یرغمال بنا لیا اور اسلحے کے زور پر لوٹ مار کی۔
ایف آئی آر کے مطابق ڈاکو گھر سے تقریباً 200 تولے سونا اور ایک کروڑ 25 لاکھ روپے مالیت کی ڈائمنڈ جیولری لے گئے۔
مزید پڑھیں: پنجاب پولیس کے صوبہ بھر میں کومبنگ آپریشنز اور موک ایکسرسائز
اس کے علاوہ ملزمان غیر ملکی کرنسی، ڈائمنڈ سیٹ، قیمتی گھڑیاں اور دیگر قیمتی سامان بھی لوٹ کر فرار ہوگئے۔
پولیس کے مطابق ملزمان صبح 4 بج کر 22 منٹ پر گھر میں داخل ہوئے۔
پولیس کا کہنا ہے کہ واقعے کی سی سی ٹی وی فوٹیج حاصل کر لی گئی ہے اور ملزمان کی شناخت اور گرفتاری کے لیے مختلف پہلوؤں سے تفتیش جاری ہے۔
