ڈھاکہ یونیورسٹی کے مرکزی شہید منار کے قریب ایک نوجوان کانٹینٹ کریئیٹر کو اتوار کی رات فائرنگ کر کے ہلاک کر دیا گیا۔ پولیس اور اسپتال کے ذرائع کے مطابق ہلاک ہونے والے کی شناخت 27 سالہ رقیب الاسلام کے طور پر ہوئی، جو شیخ برہان الدین کالج میں سیکنڈ ایئر کا طالب علم اور ویڈیو کانٹینٹ کریئیٹر تھا۔ مقتول پرانے ڈھاکہ کے نِمتولی علاقے کا رہائشی اور طارق الاسلام کھوکن کا بیٹا تھا۔
یہ بھی پڑھیں:عثمان ہادی قتل میں بھارت کے ملوث ہونے کے شواہد، ڈھاکہ ٹریبیون کی رپورٹ
پولیس کے مطابق واقعہ رات تقریباً 9:15 بجے پیش آیا، جب نامعلوم حملہ آوروں نے مرکزی شہید منار کے علاقے میں فائرنگ کی۔ عینی شاہدین کے مطابق متعدد گولیاں چلیں، جس کے بعد رقیب الاسلام شدید زخمی حالت میں پایا گیا۔ اس کی سر میں گولی لگی تھی اور متعدد زخم تیز دھار آلات سے آئے تھے۔ اسے فوری طور پر ڈھاکہ میڈیکل کالج اسپتال منتقل کیا گیا، جہاں ڈاکٹروں نے رات 10:30 بجے اسے مردہ قرار دیا۔
مقامی لوگوں نے موقع پر ایک مشتبہ شخص کو حراست میں لیا اور بعد میں شاہ باغ پولیس اسٹیشن کے حوالے کیا۔ اس کی شناخت فوری طور پر ظاہر نہیں کی گئی۔ مقتول کے دوستوں کے مطابق وہ شہید منار کے قریب ایک چائے کی دکان پر بیٹھے تھے، جب ایک نامعلوم شخص نے رقیب کو الگ بلایا، اور کچھ ہی دیر بعد فائرنگ ہوئی۔
پولیس حکام نے تصدیق کی کہ مقتول کو سر میں گولی لگی اور چھری کے متعدد زخم بھی آئے۔ حکام نے بتایا کہ واقعے کی تحقیقات جاری ہیں تاکہ قتل کے محرکات کا تعین کیا جا سکے۔
