کراچی کے علاقے سمن آباد میں راشد منہاس روڈ پر نجی اسکول کے قریب شہری کی جوابی فائرنگ سے ایک ڈاکو ہلاک ہو گیا جبکہ اس کی خاتون ساتھی کو پولیس نے گرفتار کر لیا، تیسرا ملزم موقع سے فرار ہونے میں کامیاب ہو گیا۔
پولیس کے مطابق 3 ملزمان بشمول ایک خاتون، اسلحے کے زور پر ایک شہری کو روک کر واردات کی کوشش کر رہے تھے۔ شہری نے کچھ فاصلے پر جا کر اپنے ذاتی پستول سے فائرنگ کی جس کے نتیجے میں ایک ڈاکو شدید زخمی ہو گیا جبکہ اس کا ساتھی فرار ہو گیا۔
یہ بھی پڑھیے: اسلام آباد: افغان ڈکیت گینگ کی پولیس پر فائرنگ، سرغنہ زخمی حالت میں گرفتار
فائرنگ میں زخمی ہونے والے شخص کو اسپتال منتقل کیا گیا، تاہم وہ دوران علاج زخموں کی تاب نہ لاتے ہوئے دم توڑ گیا۔ پولیس کے مطابق ہلاک ہونے والے شخص کی شناخت 25 سالہ سلمان کے نام سے ہوئی ہے۔
ایس ایچ او سمن آباد انسپکٹر زبیر اعوان کے مطابق واقعے کے بعد خاتون ملزمہ قریبی جگہ پر چھپ گئی تھی، تاہم پولیس نے اسے گرفتار کر لیا۔ گرفتار ملزمہ کی شناخت نہا کے نام سے ہوئی ہے۔
پولیس کا کہنا ہے کہ فرار ہونے والے تیسرے ملزم کی تلاش کے لیے مختلف مقامات پر چھاپے مارے جا رہے ہیں اور جلد اسے بھی گرفتار کرنے کی کوشش کی جا رہی ہے۔
