لاہور کے علاقے ڈیفنس میں افغان گینگ نے سحری کے وقت ایک بڑی ڈکیتی کی واردات کر کے 19 کروڑ سے زائد مالیت کا سونا، ڈائمنڈ جیولری، نقدی اور قیمتی سامان لوٹ لیا۔
یہ بھی پڑھیں: لاہور: ناروے سے آئے شہری سے لاکھوں روپے لوٹنے والے ڈکیت پولیس اہلکار نکلے
پولیس نے سیف سٹی کیمروں کی مدد سے ملزمان کی گاڑی ٹریس کی تو گجومتہ میں ان کے ساتھ رات کو مقابلہ ہوا جس میں گینگ کا ایک رکن زازے پٹھان ہلاک ہو گیا جبکہ اس کے 3 ساتھی فرار ہو گئے۔
ڈکیتی کیسے ہوئی؟
یہ واقعہ چند روز قبل ڈیفنس کے علاقے میں رات 4 بج کر 22 منٹ پر پیش آیا۔ متاثرہ خاندان سحری کر کے گھر واپس آیا تو گاڑی میں سوار 4 مسلح ملزمان نے موقع دیکھ کر گھر میں داخل ہو گئے۔
ایف آئی آر کے مطابق ملزمان نے اہلخانہ کو ٹی وی لاؤنج میں یرغمال بنا لیا اور سامان لوٹنا شروع کر دیا۔ ڈاکو پہلی منزل سے 200 تولے سونا، ایک کروڑ 25 لاکھ روپے مالیت کے ڈائمنڈ زیورات اور تقریباً 10 کروڑ روپے مالیت کا قیمتی سامان جبکہ دوسری منزل سے 3 کروڑ روپے مالیت کا اضافی سونا اور غیر ملکی کرنسی لے گئے۔ اس سامان کی کل مالیت 19 کروڑ روپے سے زائد بتائی جا رہی ہے۔
متاثرہ شہری عامر سعید کی مدعیت میں مقدمہ درج کیا گیا۔ عامر سعید نے بتایا کہ ہلاک ہونے والا ڈاکو زازے خان نے انہیں تشدد کا نشانہ بھی بنایاتھا ۔
افغان گینگ کا طریقہ واردات
یہ گینگ راولپنڈی کے بلال ثابت گینگ سے نکلا ہے اور سنہ 2024 میں لاہور میں کم از کم 4 بڑی ڈکیتیاں کر چکا ہے۔ یہ گینگ اس وقت ڈکیتی کی واردت کرتا ہے جب گھر کے مکین سحری یا رات کی نماز کے بعد گھر واپس آتے ہیں۔
یہ گینگ پہلے جدید جیمرز کا استعمال کرتا ہے اورڈیوائس کی مدد سے 300 میٹر تک موبائل فون اور انٹرنیٹ سروس مکمل طور پر معطل کر دیتا ہے تاکہ کوئی فوری طور پر پولیس کو اطلاع نہ دی جاسکے۔
مزید پڑھیے: لاہورمیں گن پوائنٹ پر ڈکیتیوں میں ملوث میاں بیوی گرفتار
واردات کے دوران کاروں اور بھاری رائفلوں کا استعمال ہوت ہے اور گھر میں داخل ہو کر اہلخانہ کو یرغمال بنا کر سونا، نقدی، غیر ملکی کرنسی اور قیمتی سامان لوٹ لیا جاتا ہے۔
گینگ کے اب تک 8 سے 10 کارندے مختلف مقابلوں میں مارے جا چکے ہیں۔ پولیس کا کہنا ہے کہ یہ افغان گینگ انتہائی منظم اور خطرناک ہے۔
پولیس کارروائی اور گجومتہ مقابلہ
ڈکیتی کے فوراً بعد ملزمان ایک کیفے میں چھپ گئے۔ سیف سٹی کیمروں سے گاڑی کا نمبر ٹریس کر کے کاہنہ پولیس نے ان کی تلاش شروع کی۔ جب گجومتہ کے قریب مشکوک گاڑی کو روکنے کا اشارہ کیا گیا تو ملزمان نے فائرنگ کر دی۔ پولیس کی جوابی کارروائی میں زازے پٹھان ہلاک ہو گیا جبکہ اس کے 3 ساتھی فرار ہو گئے۔
پولیس نے ملزمان کی گاڑی قبضے میں لے لی ہے۔
ہلاک ڈاکو کی لاش مردہ خانے منتقل کر دی گئی ہے۔ اہلخانہ نے بھی زازے خان کی شناخت کی تصدیق کر دی ہے فرار ملزمان کی گرفتاری کے لیے علاقے میں سرچ آپریشن جاری ہے۔ حکام نے یقین دلایا ہے کہ باقی تینوں ڈاکوں کو بھی جلد گرفتار کر کے لوٹی ہوئی اشیا کی برآمدگی یقینی بنائی جائے گی۔
یہ بھی پڑھیے: لاہور پولیس کا ’مشینی مخبر‘: اب مصنوعی ذہانت چور ڈکیت پکڑوائے گی!
مدعی عامر سعید نے پولیس سے اپیل کی ہے کہ باقی 3 ڈاکوؤں کو بھی جلد پکڑا جائے تاکہ ان کی باقی مال برآمد ہو سکے۔ پولیس تفتیش جاری رکھے ہوئے ہے اور سی سی ٹی وی فوٹیج کی بنیاد پر مزید سراغ لگانے کی کوشش کی جا رہی ہے۔
