غیر سرکاری رویت ہلال کمیٹی مسجد قاسم علی خان نے شوال کا چاند نظر نہ آنے کے باعث ہفتہ 21 مارچ کو عیدالفطر منانے کا اعلان کر دیا ہے، جبکہ جمعہ کو 30واں روزہ ہوگا۔
یہ بھی پڑھیں:شوال کا چاند نظر نہیں آیا، عیدالفطر ہفتے کے روز ہوگی، وزارت مذہبی امور کی جانب سے نوٹیفکیشن جاری
مسجد قاسم علی خان میں غیر سرکاری رویت ہلال کمیٹی کا اجلاس مولانا خیر البشر کی زیر صدارت نمازِ مغرب کے بعد شروع ہوا جو رات تقریباً ساڑھے 10 بجے تک جاری رہا۔ اجلاس میں پشاور اور مضافاتی علاقوں سے تعلق رکھنے والے علما کرام نے شرکت کی۔
پشاور میں چاند نظر نہیں آیا، عید بروز ہفتہ ہوگی، مرکزی رویت ہلال کمیٹی کے ساتھ پشاور کی زونل کمیٹی نے اعلان کردیا
مسجد قاسم علی خان کمیٹی کو بھی تاحال کوئی شہادت موصول نہیں ہوئی، اجلاس اب بھی جاری pic.twitter.com/bR92DL0xme
— Kamran Ali (@akamran111) March 19, 2026
اجلاس کے بعد میڈیا سے گفتگو کرتے ہوئے مولانا خیر البشر نے بتایا کہ چاند دیکھنے کے حوالے سے موصول ہونے والی شہادتیں شرعی تقاضوں کو پورا نہیں کر سکیں، جس کے باعث متفقہ طور پر فیصلہ کیا گیا کہ رمضان المبارک کے 30 روزے مکمل کیے جائیں۔
انہوں نے مزید کہا کہ اس فیصلے کے تحت جمعہ کو 30واں روزہ رکھا جائے گا، جبکہ یکم شوال المکرم 1447 ہجری بمطابق 21 مارچ بروز ہفتہ عیدالفطر منائی جائے گی۔
