اقوام متحدہ کی کانفرنس برائے تجارت و ترقی (UNCTAD) کی سیکریٹری جنرل ریکا گرینسپن اور بنگلہ دیش کے وزیر خارجہ ڈاکٹر خلیل الرحمان نے نیویارک میں ملاقات کے دوران مشرقِ وسطیٰ میں جاری تنازع کے تناظر میں عالمی معیشت کو درپیش خطرات پر تفصیلی تبادلہ خیال کیا۔
یہ بھی پڑھیں:بنگلہ دیش میں عوامی لیگ کی سیاسی سرگرمیاں بدستور معطل رہیں گی
ملاقات کے دوران دونوں رہنماؤں نے اس بات پر گہری تشویش کا اظہار کیا کہ خطے میں جاری کشیدگی عالمی معیشت کے لیے سنگین خطرہ بن سکتی ہے۔ ان کے مطابق بین الاقوامی تجارتی راستوں میں رکاوٹ اور توانائی کی منڈیوں میں غیر یقینی صورتحال پہلے ہی ترقی پذیر ممالک کو متاثر کر رہی ہے، جبکہ غریب ممالک اپنی معاشی ترقی کے سالوں کے نقصان کا سامنا کر سکتے ہیں۔
دونوں شخصیات نے زور دیا کہ مزید کشیدگی سے گریز کیا جائے اور تمام فریقین کو فوری طور پر سفارتی حل کی طرف بڑھنا چاہیے تاکہ خطے میں استحکام پیدا ہو اور عالمی معیشت کو مزید نقصان سے بچایا جا سکے۔
یہ بھی پڑھیں:بنگلہ دیش نے برطانیہ سے پولیس اصلاحات اور روہنگیا مسئلے میں تعاون کی درخواست کردی
ملاقات میں یہ بھی زیرِ بحث آیا کہ ریکا گرینسپن کو اقوام متحدہ کے سیکریٹری جنرل کے عہدے کے لیے بطور امیدوار نامزد کیا گیا ہے، جبکہ ڈاکٹر خلیل الرحمان اقوام متحدہ کی جنرل اسمبلی کے 81ویں اجلاس کی صدارت کے امیدوار ہیں۔ دونوں رہنماؤں نے اپنی اپنی نامزدگیوں پر بھی تبادلہ خیال کیا۔
ملاقات کے دوران بنگلہ دیش کے اقوام متحدہ میں مستقل مندوب، سفیر صلاح الدین نعمان چودھری بھی موجود تھے۔
