وزارتِ مذہبی امور و بین المذاہب ہم آہنگی نے حج 2026 کے لیے منتخب ہونے والے ایک لاکھ 19 ہزار پاکستانی عازمینِ حج کے لیے ڈیجیٹل طبی ریکارڈ کی فراہمی لازمی قرار دیتے ہوئے پاک حج ایپ پر میڈیکل سوالنامہ جاری کر دیا ہے۔
یہ بھی پڑھیں: حج 2026 کے لیے پروازوں کا شیڈول جاری کردیا گیا
ترجمان وزارتِ مذہبی امور عمر بٹ کے مطابق حج کے دوران شدید جسمانی مشقت اور ہنگامی حالات میں عازمین کو فوری اور درست طبی امداد فراہم کرنے کے لیے سعودی حکومت کی ہدایات کے مطابق یہ ڈیٹا بیس تیار کیا جا رہا ہے۔ اس مقصد کے لیے تمام عازمین کو اگلے 36 گھنٹوں، یعنی بروز جمعہ تک اپنی صحت سے متعلق تفصیلات ایپ کے ذریعے درج کرنے کی ہدایت کی گئی ہے۔
وزارت نے واضح کیا ہے کہ یہ سوالنامہ عازمینِ حج کو طبی سہولیات کی مربوط فراہمی میں کلیدی کردار ادا کرے گا۔
سوالنامے میں ذیابیطس، ہائی بلڈ پریشر، گٹھیا، تھائرائیڈ، دمہ اور امراضِ قلب سمیت دائمی بیماریوں کا اندراج کیا جائے گا تاکہ کسی بھی ہنگامی صورتحال میں طبی عملہ عازمِ حج کی طبی ہسٹری سے آگاہ ہو۔ عازمین کو ہدایت کی گئی ہے کہ بیماری موجود ہونے کی صورت میں YES اور بیماری نہ ہونے کی صورت میں NO کا انتخاب کریں۔
یہ بھی پڑھیں: حج 2026: مثالی انتظامات یقینی بنائے جائیں، عازمین کی تربیت کا پہلا مرحلہ مکمل
ترجمان کے مطابق پاک حج ایپ کو مکمل ون ونڈو آپریشن پورٹل میں تبدیل کر دیا گیا ہے، جس میں حج ویزہ کے حصول اور پرنٹ کرنے کا براہِ راست لنک بھی فعال کر دیا گیا ہے، جبکہ عازمین اپنی پروازوں کا شیڈول اور وقت بھی ایپ کے ذریعے دیکھ سکیں گے۔
وزارتِ مذہبی امور کا کہنا ہے کہ مرحلہ وار نئی معلومات اور ہدایات ایپ میں شامل کی جا رہی ہیں۔ عازمینِ حج کو تاکید کی گئی ہے کہ وہ کسی بھی دشواری سے بچنے کے لیے پاک حج 2026 موبائل ایپ سے مسلسل منسلک رہیں اور جمعہ تک اپنا طبی پروفائل لازمی مکمل کریں۔
