ایران ڈیل کے لیے تیار، ہماری ان کے ساتھ بات چیت جاری ہے، ڈونلڈ ٹرمپ

امریکی صدر ڈونلڈ ٹرمپ نے کہا ہے کہ امریکی فوج نے شاندار کارکردگی دکھائی، اب ایران ڈیل کے لیے تیار ہے، جس سلسلے میں دونوں ممالک کے درمیان مذاکرات جاری ہیں۔

مزید پڑھیں: آبنائے ہرمز میں پاکستانی آئل ٹینکر کو نشانہ بنانے کا دعویٰ من گھڑت

تقریب سے خطاب میں صدر ٹرمپ نے ایران کی جانب سے نیوکلیئر بلیک میلنگ ختم کرنے کا ذکر کرتے ہوئے کہاکہ اگر ایران کے پاس ایٹمی ہتھیار ہوتے تو وہ انہیں مشرق وسطیٰ میں استعمال کر چکا ہوتا۔ موجودہ اقدامات کے ذریعے ایرانی رجیم کے خطرات ختم کیے جا رہے ہیں۔

امریکی صدر نے یہ بھی کہاکہ اگر وہ امریکا کے صدر نہ ہوتے تو ملک آج موجود نہ ہوتا۔ انہوں نے دعویٰ کیا کہ ان کی قیادت میں جرائم پیشہ عناصر اور قاتلوں کو ملک سے نکالا گیا۔

انہوں نے ماضی کے دور میں امریکا میں داخل ہونے والے خطرناک افراد کا حوالہ دیتے ہوئے کہاکہ موجودہ حکومت ایسے عناصر کے خلاف سخت موقف اپنائے ہوئے ہے جو جرائم میں ملوث ہوں۔

ٹرمپ نے ایران پر زور دیا کہ اسے آبنائے ہرمز کھولنا پڑے گا اور کہا کہ امریکا نے اپنے اتحادیوں کے تحفظ کے لیے اہم اقدامات کیے ہیں۔

ایران کے نئے سپریم لیڈر کے بارے میں صدر ٹرمپ نے کہا کہ ان کا کوئی سراغ نہیں مل رہا، اور اگر وہ زندہ بھی ہیں تو خراب حالات میں ہوں گے۔

مزید پڑھیں: خطے میں کشیدگی کم کرنے میں پاکستان کا کلیدی کردار، چین کا اعتراف

پاک بھارت جنگ کا تذکرہ کرتے ہوئے صدر ٹرمپ نے کہا کہ جنگ کے دوران 9 طیارے گرائے گئے، صدر ٹرمپ کا کہنا تھا کہ شہباز شریف نے کہا کہ پاک بھارت جنگ رکوا کر میں نے 30 سے 50 ملین لوگوں کی جانیں بچائیں۔