پاکستان سپر لیگ (پی ایس ایل) کی فرنچائز ملتان سلطانز کے سابق مالک علی ترین نے کہا ہے کہ زیادہ تر کھلاڑیوں کے سوشل میڈیا اکاؤنٹس عموماً ہینڈلرز چلاتے ہیں کیونکہ کھلاڑیوں کے پاس خود وقت نہیں ہوتا، حتیٰ کہ میچ کے دوران بھی ٹوئٹس جاری رہتی ہیں۔
مزید پڑھیں: نسیم شاہ کی مریم نواز کیخلاف ٹوئٹ: فیاض چوہان نے کرکٹر کی تعریف پر فواد چوہدری پر تنقید کے تیر برسا دیے
لاہور ریس کلب میں میڈیا سے گفتگو کرتے ہوئے علی ترین نے نسیم شاہ کے حالیہ بیان کو سوشل میڈیا بلنڈر قرار دیتے ہوئے کہاکہ اسے اسی سیاق و سباق میں دیکھا جانا چاہیے۔
انہوں نے شائقین کے لیے جلد اچھی خبر آنے کی امید ظاہر کی اور کہا کہ اسٹیڈیمز میں کرکٹ شائقین کی واپسی جلد شروع ہو جائے گی۔
علی ترین نے واضح کیا کہ وہ ملتان سلطانز کی جیت کا کریڈٹ نہیں لینا چاہتے، تاہم بغیر شائقین کے کھیل کا مزہ نہیں آتا۔ انہوں نے گوہر شاہ کو محدود وقت میں مضبوط ٹیم بنانے پر بھی سراہا۔
علی ترین نے پی ایس ایل کی پروڈکشن کوالٹی بہتر بنانے کی ضرورت پر زور دیتے ہوئے کہاکہ بغیر اعلیٰ معیار کی پروڈکشن کے کسی بھی کھیل کا ایونٹ مکمل کامیاب نہیں ہو سکتا۔
انہوں نے مزید کہاکہ ٹیم مالک کی نہیں بلکہ فینز کی ہوتی ہے اور مالک صرف ٹیم کا نگہبان ہوتا ہے۔
ان کے مطابق پی ایس ایل کی کامیابی کا سہرا ابتدائی 5 فرنچائزز کو جاتا ہے کیونکہ ابتدا میں کسی کو یقین نہیں تھا کہ لیگ کامیاب ہوگی۔
علی ترین نے کہا کہ پی ایس ایل ایک شاندار ایونٹ ہے جسے پورا پاکستان دیکھتا ہے۔
مزید پڑھیں: نسیم شاہ کی مریم نواز کیخلاف ٹوئٹ: فیاض چوہان نے کرکٹر کی تعریف پر فواد چوہدری پر تنقید کے تیر برسا دیے
واضح رہے کہ قومی کرکٹر نسیم شاہ نے پی ایس ایل کی افتتاحی تقریب میں مریم نواز کی شرکت پر سوال اٹھاتے ہوئے کہا تھا کہ ان کو ملکہ جیسا پروٹوکول کیوں دیا جا رہا ہے۔
بعد ازاں نسیم شاہ کے ایکس اکاؤنٹ سے ٹوئٹ ڈیلیٹ کرنے کے بعد کہا گیا کہ ان کا اکاؤنٹ ہیک ہوگیا تھا، تاہم پی سی بی نے کرکٹر کو شوکاز نوٹس جاری کردیا ہے۔
