امریکی صدر ڈونلڈ ٹرمپ نے ایران کے خلاف کسی بھی فوجی کارروائی میں شامل نہ ہونے پر برطانیہ اور فرانس پر سخت تنقید کی ہے اور کہا ہے کہ اب امریکا دیگر ممالک کی مدد کے لیے موجود نہیں ہوگا۔
ڈونلڈ ٹرمپ نے سوشل میڈیا پر جاری بیان میں کہاکہ برطانیہ نے ایران کی حکومت کو گرانے کی کوشش میں حصہ لینے سے انکار کیا، جبکہ فرانس اسرائیل کو فوجی سامان لے جانے والے طیاروں کو فضائی حدود سے گزارنے کی اجازت نہیں دے گا۔
انہوں نے مزید کہاکہ فرانس ایران کے حوالے سے غیر مددگار رویہ اختیار کر رہا ہے اور یہ بات یاد رکھی جائے گی۔
امریکی صدر نے آبنائے ہرمز کی وجہ سے جیٹ فیول نہ حاصل کرنے والے ممالک کے لیے بھی تجاویز دیں، اور کہاکہ وہ ممالک امریکا سے جیٹ فیول خریدیں یا ہمت کر کے آبنائے ہرمز جا کر اپنا فیول خود حاصل کریں۔
ڈونلڈ ٹرمپ نے واضح کیاکہ اب ہر ملک کو اپنی حفاظت خود کرنی ہوگی، بالکل ویسے ہی جیسے دیگر ممالک نے امریکا کے لیے مدد فراہم نہیں کی۔
انہوں نے دعویٰ کیاکہ ایران قریباً تباہ ہو چکا ہے اور مشکل مرحلہ مکمل ہو چکا ہے، اب دیگر ممالک کو اپنا تیل خود حاصل کرنا ہوگا۔
