کراچی پورٹ ٹرسٹ (کے پی ٹی) اور رومانیہ کی میری ٹائم پورٹس ایڈمنسٹریشن ایس اے، بندرگاہ قسطنطہ، کے درمیان بحری تعاون، تجارتی روابط اور اقتصادی تعلقات کے فروغ کے لیے ایک تاریخی مفاہمتی یادداشت پر دستخط کیے گئے ہیں۔
یہ بھی پڑھیں: وزارت اقتصادی امور اور کراچی پورٹ ٹرسٹ کے اکاؤٹس ہیک
یہ معاہدہ چیئرمین کے پی ٹی، ریئر ایڈمرل شاہد احمد، اور جنرل منیجر بندرگاہ قسطنطہ، میہائی تھیوڈورسکو نے مشترکہ طور پر کیا۔ اس موقع پر پاکستان میں رومانیہ کے سفیر اور رومانیہ میں پاکستان کے سفیر سمیت دونوں ممالک کے دیگر سفارتی و سرکاری حکام بھی موجود تھے۔
اس مفاہمتی یادداشت کے تحت بندرگاہی آپریشنز، انجینئرنگ، ٹیکنالوجی، مالیات، بحری تعلیم اور معلومات کے تبادلے کے شعبوں میں تعاون کو فروغ دیا جائے گا، جبکہ دونوں بندرگاہوں کی علاقائی اہمیت کو بطور کلیدی تجارتی دروازے مؤثر انداز میں بروئے کار لایا جائے گا۔
مزید پڑھیں: کراچی بندرگاہ سے متحدہ عرب امارات کے لیے نئی فیڈر شپنگ سروس شروع
چیئرمین کے پی ٹی نے بندرگاہی خدمات کی بہتری کے لیے جاری اقدامات پر روشنی ڈالی، جبکہ رومانیہ کے نمائندگان نے قسطنطہ کی حیثیت کو ایک اہم یورپی تجارتی مرکز کے طور پر اجاگر کیا۔
دونوں فریقین نے اس شراکت داری کو بدلتے ہوئے عالمی تجارتی منظرنامے کے تناظر میں بروقت اور نہایت اہم قرار دیا۔
تقریب کے اختتام پر ڈاکٹر ڈین اسٹوئنسکو نے اپنے خیالات کا اظہار کرتے ہوئے پاکستان کے ساتھ بحری تعاون کو مزید مستحکم بنانے کے عزم کا اعادہ کیا۔
