سعودی عرب کے شمالی سرحدی علاقے میں حالیہ بارشوں نے قدرتی حسن کو ایک نئی زندگی دے دی ہے جہاں قلبان الدوید نامی نشیبی علاقہ دلکش آبی منظر میں تبدیل ہو گیا۔۔
یہ بھی پڑھیں: سعودی عرب: موسم بہار کی بارشوں نے قدرتی مناظر کو یکسر تبدیل کردیا، شہری لطف اندوز ہونے لگے
عرب نیوز کے مطابق بارش کے بعد اس علاقے میں 250 سے زائد کنویں نمایاں ہو گئے ہیں جو زمین پر گول دائرے کی شکل میں ترتیب دیے گئے ہیں۔
یہ منفرد ترتیب قدیم دور کی ذہانت اور صحرائی ماحول میں پانی محفوظ کرنے کے روایتی طریقوں کی عکاسی کرتی ہے۔
ماہرین کا کہنا ہے کہ یہ کنویں صحرائی زندگی کے لیے نہایت اہم تھے اور پانی کے حصول کا ایک مؤثر ذریعہ سمجھے جاتے تھے۔
مزید پڑھیے: سعودی عرب اور متحدہ عرب امارت میں شدید بارشیں، طوفان اور برفباری
ادھر وزارت ماحولیات، پانی و زراعت کے علاقائی دفتر نے ان کنوؤں کے تحفظ کے لیے اقدامات شروع کر دیے ہیں۔
اس منصوبے کے تحت کنوؤں کی باقاعدہ فہرست سازی اور نگرانی کی جا رہی ہے جبکہ ان کے منہ پر مضبوط ڈھکن اور کنکریٹ کے ڈھانچے بھی نصب کیے جا رہے ہیں تاکہ پانی کو آلودگی سے بچایا جا سکے۔
مزید پڑھیں: جدہ میں 2022 کے بعد سب سے زیادہ بارش ریکارڈ
حکام کے مطابق ان اقدامات کا مقصد نہ صرف سیاحوں کی حفاظت یقینی بنانا ہے بلکہ ان تاریخی کنوؤں کو ایک پائیدار اور اہم آبی وسیلے کے طور پر محفوظ رکھنا بھی ہے۔
