ملک کی پہلی نیشنل فارنزک ایجنسی (این ایف اے) باقاعدہ طور پر فعال ہو گئی۔
یہ بھی پڑھیں: محسن نقوی کے اسلام آباد میں مختلف منصوبوں کے دورے، پولیس اور جیل نظام میں بہتری کی ہدایات
وزارت داخلہ نے جمعہ کے روز اعلان کے مطابق یہ ادارہ ’نیشنل فارنزک ایجنسی بل 2024‘ کے تحت قائم کیا گیا تھا جسے گزشتہ سال قانون کی شکل دی گئی تھی۔
وفاقی وزیر داخلہ محسن نقوی نے این ایف اے کے ہیڈکوارٹرز کا دورہ کیا اور اس امید کا اظہار کیا کہ یہ ادارہ قومی سلامتی کے امور میں معاون ثابت ہوگا اور جرائم کی روک تھام میں اہم کردار ادا کرے گا۔
دورے کے دوران محسن نقوی نے کہا کہ نیشنل فارنزک ایجنسی ملک بھر کی قانون نافذ کرنے والے اداروں کو جدید سہولیات فراہم کرے گی۔
مزید پڑھیے: سرکاری اداروں میں کرپشن کے خلاف زیرو ٹالرنس پالیسی اختیار کی جائے گی، وزیر داخلہ محسن نقوی
انہوں نے ہدایت دی کہ ادارے کے دفاتر خیبر پختونخوا، بلوچستان، آزاد کشمیر اور گلگت بلتستان میں بھی قائم کیے جائیں جبکہ اس کی خدمات کو بھرپور طریقے سے اجاگر کیا جائے۔
ڈائریکٹر جنرل این ایف اے حسنات رسول نے وزیر داخلہ کو ادارے کی کارکردگی پر بریفنگ دیتے ہوئے بتایا کہ پہلے مرحلے کا کام مکمل ہو چکا ہے۔
حسنات رسول نے بتایا کہ ادارہ ڈیجیٹل فارنزک کے مختلف شعبوں میں خدمات فراہم کر رہا ہے، جن میں ڈیپ فیک، کمپیوٹر اور موبائل فرانزکس، آڈیو ویڈیو، نیٹ ورک اور ڈرون فرانزکس شامل ہیں۔
قلیل مدت میں پاکستان کی پہلی جدید ترین نیشل فرانزک ایجنسی مکمل فعال
وفاقی وزیر داخلہ محسن نقوی کا نیشل فرانزک ایجنسی کا دورہ
وزیر داخلہ نے نیشل فرانزک ایجنسی میں قائم ریسرچ اینڈ انوویشن لیب، ڈیجیٹل فرانزک لیب، نارکوٹکس لیب، فنٹیک لیب اور کوایشچن ایبل ڈاکومنٹ لیب کا دورہ کیا pic.twitter.com/ksHU5GQdAl— Ministry of Interior GoP (@MOIofficialGoP) April 3, 2026
بریفنگ میں بتایا گیا کہ ایک سال کے دوران ڈیجیٹل فارنزک کے 1500 کیسز رپورٹ ہوئے جبکہ دوسرے مرحلے میں 25 خصوصی لیبارٹریز قائم کی جائیں گی۔
وزیر داخلہ نے اپنے دورے کے دوران ریسرچ اینڈ انوویشن لیب، ڈیجیٹل فرانزکس لیب، نارکوٹکس لیب، فن ٹیک لیب اور مشکوک دستاویزات کی لیب کا بھی معائنہ کیا۔ علاوہ ازیں انہوں نے ڈی این اے، اسلحہ، سیرو لوجی اور دھماکہ خیز مواد سے متعلق شعبوں کا جائزہ لیا۔
مزید پڑھیں: محسن نقوی کی چینی سفیر سے اہم ملاقات، سرمایہ کاروں کے تحفظ کے لیے اہم فیصلے
محسن نقوی نے قلیل مدت میں ادارے کو مکمل فعال بنانے پر ٹیم کی کارکردگی کو سراہا جبکہ اس موقع پر انہوں نے اسسٹنٹ سپرنٹنڈنٹس آف پولیس کی تربیت سے متعلق بھی معلومات حاصل کیں۔
