بنگلہ دیش کے دارالحکومت ڈھاکہ میں پولیس نے انسانی اسمگلنگ کے ایک مبینہ نیٹ ورک کے خلاف کارروائی کرتے ہوئے چار روہنگیا افراد کو گرفتار کر لیا۔ ملزمان کو خفیہ اطلاع پر کیے گئے چھاپے کے دوران حراست میں لیا گیا۔
یہ بھی پڑھیں:ڈھاکہ کے سابق پولیس کمشنر عبدالجلیل گرفتار
بنگلہ دیشی میڈیا کے مطابق ڈھاکہ میٹروپولیٹن پولیس (DMP) کے ڈیٹیکٹو برانچ نے موٹی جھیل کے علاقے میں ایک ہوٹل پر چھاپہ مار کر انسانی اسمگلنگ میں ملوث 4 افراد کو گرفتار کیا۔ کارروائی جمعرات 2 اپریل کو خفیہ معلومات کی بنیاد پر کی گئی۔
گرفتار ملزمان کی شناخت محمد فردوس، نورُو بی بی در اختر (19)، امہ کُلثوم (20) اور ایک کم عمر ملزم کے طور پر ہوئی ہے۔ پولیس کے مطابق ملزمان کے قبضے سے چار موبائل فونز اور دو ویزوں کی نقول برآمد ہوئی ہیں، جنہیں اسمگلنگ میں استعمال کیا جا رہا تھا۔
یہ بھی پڑھیں:پاکستان اور بنگلہ دیش کے درمیان ثقافتی تعاون بڑھانے پر اتفاق
پولیس حکام کا کہنا ہے کہ ابتدائی تفتیش کے دوران ملزمان نے طویل عرصے سے انسانی اسمگلنگ میں ملوث ہونے کا اعتراف کیا ہے۔ اس حوالے سے موٹی جھیل تھانے میں مقدمہ درج کر کے ملزمان کو عدالت میں پیش کر دیا گیا ہے۔
حکام کے مطابق انسانی اسمگلنگ کے اس نیٹ ورک کے مزید پہلوؤں کی تحقیقات جاری ہیں اور مزید گرفتاریاں بھی متوقع ہیں۔
