وزیر داخلہ بلوچستان ضیا لانگو نے کہا ہے کہ افغان سرزمین پاکستان کے خلاف استعمال ہورہی ہے، اب مہاجرین کو اپنے ملک میں جانا ہوگا۔
کوئٹہ میں ایڈیشنل سیکریٹری داخلہ اور دیگر کے ہمراہ پریس کانفرنس کرتے ہوئے انہوں نے کہاکہ ملک دشمن عناصر سازشوں میں مصروف ہیں لیکن ان کی سازشوں کو ہر صورت ناکام بنایا جائے گا۔
افغان مہاجرین کو اپنے ملک واپس جانا ہوگا۔ عزت کا راستہ یہی ہے کہ ریاست نے جو طریقۂ کار واضح کیا ہے، اس کا احترام کرتے ہوئے باعزت طریقے سے اپنے ملک واپس چلے جائیں۔ وزیرِ داخلہ بلوچستان pic.twitter.com/g5AGSYW0if
— WE News (@WENewsPk) April 5, 2026
ان کا کہنا تھا کہ پاکستان ایک ذمہ دار ریاست ہے اور عالمی سطح پر خود کو ایک ذمہ دار ایٹمی ملک کے طور پر منوا چکا ہے۔
انہوں نے کہاکہ خطے میں ایک بڑی جنگ جاری ہے، پاکستان کو ایک سازش کے تحت بدامنی کا شکار رکھا گیا۔
ان کے مطابق بھارت کے 18 قونصل خانے پاکستان کے خلاف سرگرم عمل ہیں جبکہ بھارت اپنی خفت مٹانے میں ناکام ہے اور مئی 2025 کی شکست بھی بھلا نہیں پا رہا۔
ضیا لانگو کا کہنا تھا کہ فورسز، انٹیلی جنس اداروں، پولیس اور عوام نے ہزاروں قربانیاں دی ہیں اور ریاستی اداروں نے ہمیشہ ملکی مفاد میں کام کیا ہے۔
انہوں نے الزام عائد کیاکہ افغانستان اپنی ذمہ داری پوری کرنے کے بجائے سازشوں کا ذریعہ بنا ہوا ہے، تاہم افغانستان کے عوام سے پاکستان کی کوئی دشمنی نہیں۔
انہوں نے کہاکہ ایک پرامن اور تعلیم یافتہ افغانستان کے پاکستان پر مثبت اثرات مرتب ہوں گے۔
ان کا مزید کہنا تھا کہ پاکستان کے عوام کی زندگی اور ملک کا ایک ایک انچ جان سے زیادہ عزیز ہے اور جو بھی پاکستان کی جانب میلی آنکھ سے دیکھے گا اسے بھرپور جواب دیا جائے گا۔
وزیر داخلہ بلوچستان نے کہا کہ افغان مہاجرین کے لیے بہتری اسی میں ہے کہ وہ اپنے ملک واپس چلے جائیں، بصورت دیگر ریاست کے طے کردہ طریقہ کار کے مطابق کارروائی عمل میں لائی جائے گی۔
انہوں نے یہ بھی کہا کہ کچھ عناصر کی جانب سے دہشتگردوں کی حمایت کی جا رہی ہے، جسے کسی صورت برداشت نہیں کیا جائے گا۔
گرفتار دہشتگرد کا تعلق افغانستان سے ہے، ایڈیشنل چیف سیکریٹری داخلہ
اس موقع پر ایڈیشنل چیف سیکریٹری داخلہ حمزہ شفقات نے کہاکہ سیکیورٹی اداروں کی کارروائی میں گرفتار ہونے والے دہشتگرد حبیب اللہ کا تعلق تحریک طالبان افغانستان سے ہے، جو بلوچستان میں ’لالو‘ کے نام سے آپریشن کرتا تھا۔
مزید پڑھیں: خیبر پختونخوا میں غیرقانونی افغان مہاجرین کی حفاظت کی جا رہی ہے، وزیرداخلہ محسن نقوی
انہوں نے بتایا کہ اس کا بھائی افغانستان کے صوبہ پکتیکا میں تحریک طالبان پاکستان کا کمانڈر ہے۔ یہ ایک ہائبرڈ نظام ہے، جس میں ٹی ٹی اے اور ٹی ٹی پی ہمارے ملک میں دہشتگردی کرتے ہیں۔
