بنگلہ دیش حکومت نے سابق کپتان کرکٹ ٹیم تمیم اقبال کو بنگلہ دیش کرکٹ بورڈ کا صدر مقرر کردیا، جبکہ امین الحق اسلام کی سربراہی میں قائم بی سی بی بورڈ آف ڈائریکٹرز کو تحلیل کردیا گیا ہے۔
یہ فیصلہ گزشتہ سال اکتوبر میں ہونے والے بی سی بی انتخابات سے متعلق مختلف الزامات کی تحقیقات کرنے والی پانچ رکنی کمیٹی کی سفارشات کی روشنی میں کیا گیا۔
37 سالہ تمیم اقبال بی سی بی کی تاریخ کے کم عمر ترین صدر بن گئے ہیں۔ وہ 11 رکنی ایڈہاک کمیٹی کی قیادت کریں گے، جس میں سابق بنگلہ دیش کپتان منہاج الحق عابدین، سابق کرکٹر و ٹی وی مبصر اطہر علی خان بھی شامل ہیں۔
حکومتی تحقیقاتی کمیٹی نے وزارت کھیل میں پریس بریفنگ کے دوران اپنی سفارشات پیش کیں اور انتخابات کی تحقیقات کے بعد اپنی تفصیلات سے آگاہ کیا۔
نیشنل اسپورٹس کونسل کے ڈائریکٹر محمد امین الحق احسن نے کہاکہ انتخابی عمل میں بے ضابطگیوں کے شواہد سامنے آنے کے بعد بی سی بی کی منتخب باڈی کو تحلیل کرنا پڑا۔
انہوں نے مزید بتایا کہ آئی سی سی کو بھی ایڈہاک کمیٹی کے قیام سے آگاہ کر دیا گیا ہے جو آئندہ تین ماہ تک بورڈ چلائے گی۔
امین الحق احسن کے مطابق نیشنل اسپورٹس کونسل نے تحقیقاتی رپورٹ کا جائزہ لینے کے بعد یہ نتیجہ اخذ کیا کہ موجودہ بی سی بی بورڈ کی تشکیل کے انتخابی عمل میں نمایاں کمزوریاں اور بے ضابطگیاں موجود تھیں۔
انہوں نے کہاکہ اس فیصلے کے حوالے سے آئی سی سی کو ای میل کے ذریعے مطلع کر دیا گیا ہے۔ ساتھ ہی 11 رکنی ایڈہاک کمیٹی کے قیام کا اعلان بھی کیا گیا ہے، جو تین ماہ کے اندر ایک منتخب کمیٹی پیش کرنے کی پابند ہوگی اور اس عرصے میں منتخب کمیٹی کی طرح تمام اختیارات کے ساتھ کرکٹ کے معاملات چلائے گی۔
انہوں نے کہاکہ وزارت کھیل کے پاس بی سی بی بورڈ تحلیل کرنے کا قانونی اختیار موجود ہے، جس کے لیے این ایس سی ایکٹ 2018 کی دفعہ 21 کا حوالہ دیا گیا، جس کے تحت حکومت کو ضرورت پڑنے پر ایگزیکٹو کمیٹی تحلیل کر کے ایڈہاک کمیٹی بنانے کا اختیار حاصل ہے۔
ادھر امین الحق اسلام نے اتوار کو کہا تھا کہ وہ بورڈ میں جاری بحران کے باوجود صدر کے عہدے پر برقرار رہنے کے لیے پُرعزم ہیں۔
انہوں نے بتایا تھا کہ گزشتہ سال انتخابات میں بے ضابطگیوں اور اختیارات کے غلط استعمال سے متعلق تحقیقات کرنے والی کمیٹی اپنی رپورٹ حکومت کو پیش کر چکی ہے۔
مزید پڑھیں: محسن نقوی سے بنگلہ دیش کرکٹ بورڈ کے صدر کی ملاقات، بھارت کے خلاف مؤقف کی حمایت پر اظہار تشکر
تمیم اقبال بنگلہ دیش کے مایہ ناز کرکٹرز میں شمار ہوتے ہیں، جنہوں نے تینوں فارمیٹس میں مجموعی طور پر 391 بین الاقوامی میچز کھیلے۔
انہوں نے 38 میچز میں ٹیم کی قیادت کرتے ہوئے 21 کامیابیاں حاصل کیں۔
