پاکستان فٹبال فیڈریشن کے صدر سید محسن گیلانی نے فیفا سیریز کے پہلے میچ میں پاکستان ویمنز ٹیم کی شاندار فتح کا کریڈٹ وزیراعظم شہباز شریف اور فیلڈ مارشل عاصم منیر کے نام کردی۔
اپنے بیان میں محسن گیلانی نے قوم کو اس کامیابی پر مبارکباد دی اور کہاکہ جب ہمارے وزیرِاعظم اور فیلڈ مارشل قومی امن کے لیے نمایاں کردار ادا کررہے ہیں تو ہماری بیٹیوں نے فٹ بال کے میدان میں نئی تاریخ رقم کی ہے، اسی وجہ سے یہ فتح وہ دونوں قائدین کے نام کرتے ہیں۔
انہوں نے یقین دلایا کہ فیڈریشن بھی اپنی ذمہ داری پوری کرتے ہوئے پاکستان کا نام فٹ بال میں مزید روشن کرے گی، یہ کامیابی خواتین فٹ بال کے سنہری دور کی شروعات ہے، کھلاڑیوں نے ثابت کیا ہے کہ وہ عالمی معیار کا کھیل پیش کر سکتی ہیں۔
محسن گیلانی نے اعلان کیاکہ خواتین فٹ بال کی ترقی کے لیے مزید اقدامات کیے جائیں گے تاکہ ملک کو بین الاقوامی سطح پر مزید کامیابیاں مل سکیں۔
