برطانوی وزیرِاعظم کیئر اسٹارمر نے وزیراعظم شہباز شریف سے ٹیلیفون پر رابطہ کیا، جس میں دوطرفہ تعلقات، علاقائی امن اور حالیہ سفارتی پیش رفت پر تبادلہ خیال کیا گیا۔
برطانوی وزیرِاعظم نے پاکستان کی جانب سے امریکا اور ایران کے درمیان جنگ بندی اور مذاکرات کی بحالی میں ادا کیے گئے مؤثر سفارتی کردار کو سراہا۔
یہ بھی پڑھیں: اسحاق ڈار اور برطانوی وزیر ہیمرش فالکنر کا ٹیلیفونک رابطہ، برطانیہ کی جانب سے پاکستان کی امن کوششوں کی تعریف
انہوں نے اسلام آباد میں امن مذاکرات کی میزبانی پر وزیرِاعظم شہباز شریف کو مبارکباد دیتے ہوئے اس عمل کی کامیابی کے لیے نیک خواہشات کا اظہار کیا۔
وزیرِاعظم شہباز شریف نے اس موقع پر علاقائی امن و استحکام کے لیے پاکستان کے عزم کا اعادہ کیا۔
انہوں نے یورپی و عالمی رہنماؤں کی جانب سے جاری مشترکہ بیان کا خیرمقدم کیا، جس میں پاکستان کی امن کوششوں کی تائید کی گئی۔
مزید پڑھیں: آسٹریلیا کا مشرق وسطیٰ جنگ بندی کا خیرمقدم، شہباز شریف کا شکریہ اور پاکستان کے کردار کا اعادہ
دونوں رہنماؤں نے اس بات پر زور دیا کہ جنگ بندی کو برقرار رکھنا نہایت ضروری ہے تاکہ خطے میں پائیدار امن اور استحکام کے لیے سازگار ماحول پیدا کیا جا سکے۔
گفتگو کے دوران پاکستان اور برطانیہ کے درمیان دیرینہ دوستانہ تعلقات کو مزید مضبوط بنانے پر بھی اتفاق کیا گیا، اور باہمی دلچسپی کے تمام شعبوں میں تعاون بڑھانے کے عزم کا اظہار کیا گیا۔
وزیرِاعظم شہباز شریف نے برطانوی ہم منصب کو پاکستان کے سرکاری دورے کی دعوت بھی دہرائی۔
