وزیر اعلیٰ پنجاب مریم نواز شریف نے پنجاب ڈویلپمنٹ پروگرام کی ہفتہ وار رپورٹ طلب کرتے ہوئے تمام جاری ترقیاتی منصوبوں کی رفتار مزید تیز کرنے کی ہدایت جاری کر دی ہے۔
وزیر اعلیٰ نے محکمہ لوکل گورنمنٹ کو ہدایت کی ہے کہ صوبے کے تمام شہروں میں جاری منصوبوں پر باقاعدہ اور تفصیلی رپورٹس پیش کی جائیں، جبکہ مثالی گاؤں منصوبوں کی پیشرفت کا جائزہ بھی ہر ہفتے لیا جائے گا۔
یہ بھی پڑھیے: پنجاب: بچوں اور خواتین کے تحفظ کے لیے خصوصی سائبر کرائم یونٹ کی منظوری
لوکل گورنمنٹ اینڈ کمیونٹی ڈویلپمنٹ ڈیپارٹمنٹ کے تحت 51 شہروں میں ترقیاتی منصوبوں پر کام جاری ہے۔ اجلاس میں بتایا گیا کہ صفائی اور نکاسی آب کے نظام کو بہتر بنانے کے لیے جدید مشینری بھی فراہم کی جا رہی ہے جس میں ڈی سلٹنگ مشینیں، سیکشن مشینیں، جیٹنگ مشینیں اور ڈی واٹرنگ سیٹس شامل ہیں۔
وزیر اعلیٰ مریم نواز شریف نے ویسٹ کنٹینرز اور کوڑے دان مستقل طور پر صاف رکھنے کی بھی ہدایت دی اور کہا کہ شہری صفائی کے نظام میں کسی قسم کی کوتاہی برداشت نہیں کی جائے گی۔
اجلاس میں بتایا گیا کہ پنجاب میں پہلی مرتبہ ایچ ڈی پی ای پائپ لائننگ پلانٹ نصب کیا جا رہا ہے جو 20 اپریل سے فعال ہو جائے گا، جبکہ جنوبی پنجاب میں بھی اسی نوعیت کا پلانٹ قائم کرنے کی منظوری دی گئی ہے۔
یہ بھی پڑھیے: کیا سابق وزیراعلیٰ پنجاب چوہدری پرویز الٰہی کو گورنر پنجاب بنایا جارہا ہے؟
وزیر اعلیٰ کی زیر صدارت خصوصی اجلاس میں پراجیکٹ گیلری کے ذریعے ہر تحصیل میں جاری ترقیاتی منصوبوں کا تصویری جائزہ لیا گیا جبکہ لائیو ڈیش بورڈ پر مالی اور جسمانی پیشرفت کا تفصیلی معائنہ بھی کیا گیا۔
مریم نواز شریف نے کہا کہ ماضی کے 5 برسوں میں جتنے ترقیاتی منصوبے مکمل نہیں ہوئے، موجودہ حکومت نے وہ کام دو سال کے عرصے میں مکمل کیے ہیں۔ انہوں نے ہدایت کی کہ واسا منصوبوں کی جلد تکمیل کے بعد شہروں کی خوبصورتی اور بیوٹیفکیشن پر خصوصی توجہ دی جائے۔
