سندھ رینجرز اور سی ٹی ڈی نے انٹیلیجنس معلومات کی بنیاد پر سائٹ ایریا میں ٹارگٹڈ آپریشن کرتے ہوئے فتنہ الخوارج کے مطلوب دہشتگرد نور عالم عرف وفادار کو گرفتار کرلیا۔ گرفتار دہشتگرد کے قبضے سے بھاری مقدار میں اسلحہ اور دھماکا خیز بارودی مواد برآمد ہوا ہے۔
ترجمان رینجرز کے مطابق نور عالم عرف وفادار ایک عرصے سے ریاست مخالف سرگرمیوں میں ملوث رہا ہے، ملزم 2014 میں مفتی نور ولی گروہ میں شامل ہوا تھا اور جنوبی وزیرستان میں سیکیورٹی فورسز پر متعدد حملوں میں ملوث رہا ہے۔
یہ بھی پڑھیں: حیدر آباد: سی ٹی ڈی اور رینجرز کی کارروائی، کالعدم تنظیم کا کمانڈر گرفتار
ترجمان رینجرز کے مطابق 2021 میں لیویز چیک پوسٹ پر حملے میں بھی ملوث تھا، جہاں فائرنگ کے تبادلے میں اس کے دو ساتھی ہلاک ہوئے جبکہ ملزمان نے 6 اہلکاروں کو اغوا کر لیا تھا۔ ملزم آئی ای ڈیز نصب کرنے اور ریموٹ کنٹرول دھماکوں کا ماہر سمجھا جاتا ہے۔
آپریشنز کے خوف سے ملزم افغانستان فرار ہو گیا تھا جہاں سے وہ کمانڈر بلال عرف طوفان کی ہدایات پر نیٹ ورک چلا رہا تھا۔ حالیہ معلومات کے مطابق، ملزم کراچی میں روپوش ہو کر دہشتگردی کا نیا نیٹ ورک منظم کرنے کی کوشش کر رہا تھا جسے بروقت کارروائی کر کے ناکام بنا دیا گیا۔
یہ بھی پڑھیں: کراچی: رینجرز نے سی ٹی ڈی تھانے سے عراق سے آئے شہری کو کیسے بازیاب کرایا؟
رینجرز ترجمان کا کہنا ہے کہ گرفتار دہشتگرد کو مزید قانونی کارروائی اور تفتیش کے لیے سی ٹی ڈی کے حوالے کر دیا گیا ہے۔ نور عالم سے ملنے والی معلومات کی روشنی میں اس کے دیگر ساتھیوں کی گرفتاری کے لیے شہر کے مختلف حصوں میں چھاپے مارے جا رہے ہیں۔ حکام کا کہنا ہے کہ کراچی کے امن کو خراب کرنے والی کسی بھی بیرونی سازش کو پنپنے نہیں دیا جائے گا۔
کراچی سمیت ملک بھر میں گزشتہ تین ماہ (فروری تا اپریل 2026) کے دوران دہشتگردی کے خلاف کارروائیوں میں تیزی دیکھی گئی ہے۔
یہ بھی پڑھیں: رینجرز کی کراچی میں کارروائی، 3 انتہائی مطلوب سہولتکار دہشتگرد گرفتار
حال ہی میں کراچی کے مختلف علاقوں سے 15 سے زائد ہائی پروفائل دہشتگرد گرفتار ہو چکے ہیں، زیادہ تر گرفتاریاں فتنہ الخوارج اور بی ایل اے کے سلیپر سیلز کے خلاف کی گئیں۔
گزشتہ 90 دنوں میں رینجرز نے 50 کلو سے زائد بارودی مواد اور درجنوں خودکار ہتھیار قبضے میں لیے۔ افغانستان سے متصل سرحدوں پر سختی کے باعث کئی دہشتگردوں نے شہری علاقوں کا رخ کیا، جنہیں انٹیلیجنس بیسڈ آپریشنز کے ذریعے پکڑا گیا۔
