گزشتہ سیشن میں شدید مندی کے بعد پاکستان اسٹاک ایکسچینج میں منگل کے روز زبردست تیزی دیکھنے میں آئی، جہاں سرمایہ کاروں کی دلچسپی دوبارہ بحال ہونے پر کے ایس ای 100 انڈیکس میں ابتدائی لمحات میں 3700 سے زائد پوائنٹس کا اضافہ ریکارڈ کیا گیا۔
مزید پڑھیں: پاکستان کی کوششوں سے امریکا ایران جنگ بندی، عالمی منڈیوں اور پاکستان اسٹاک ایکسچینج میں تاریخی تیزی
صبح قریباً 9 بج کر 35 منٹ پر بینچ مارک انڈیکس 164,322 پوائنٹس کی سطح پر پہنچ گیا، جو 3730 پوائنٹس یا 2.32 فیصد اضافے کو ظاہر کرتا ہے۔
مارکیٹ میں خریداری کا رجحان اہم شعبوں میں دیکھا گیا جن میں گاڑیوں کی تیاری، سیمنٹ، کمرشل بینک، کھاد، تیل و گیس کی تلاش، آئل مارکیٹنگ کمپنیاں، بجلی پیدا کرنے والے ادارے اور ریفائنریز شامل ہیں۔
بڑے حصص جیسے ایچ بی ایل، ایم سی بی، میزان بینک، مری پیٹرولیم، او جی ڈی سی، پاکستان آئل فیلڈز، پاکستان پیٹرولیم، پاکستان اسٹیٹ آئل، حبکو، پاکستان ریفائنری اور اٹک ریفائنری میں اضافہ دیکھا گیا۔
یاد رہے کہ پیر کے روز مارکیٹ میں شدید مندی دیکھنے میں آئی تھی جہاں کے ایس ای 100 انڈیکس 6600 پوائنٹس کی کمی کے ساتھ 160,591 پوائنٹس پر بند ہوا تھا، جس کی وجہ امریکا اور ایران کے درمیان جاری مذاکرات میں غیر یقینی صورتحال تھی۔
مزید پڑھیں: پاکستان اسٹاک ایکسچینج میں زبردست تیزی، کے ایس ای 100 انڈیکس 1600 پوائنٹس بڑھ گیا
عالمی سطح پر بھی مثبت رجحان دیکھنے میں آیا، جہاں ایشیائی منڈیوں میں اضافہ جبکہ تیل کی قیمتوں اور محفوظ سمجھی جانے والی کرنسی کی قدر میں کمی ہوئی۔ اس کی بڑی وجہ امریکا اور ایران کے درمیان مذاکرات کا جاری رہنا بتایا جا رہا ہے۔
