وزیر خزانہ محمد اورنگزیب نے کہا کہ میں بہترین سفارت کاری پر وزیرِاعظم شہباز شریف اور فیلڈ مارشل عاصم منیر سمیت ملکی قیادت کا شکر گزار ہوں۔
واشنگٹن میں پریس کانفرنس کرتے ہوئے ان کا کہنا تھا کہ امریکا میں ہمیں جو تحسین مل رہی ہے، اس کی کوئی نظیر نہیں ملتی۔ آئی ایم ایف، عالمی بینک، مختلف ممالک اور ان کے وزرائے خزانہ اعتراف کر رہے ہیں کہ پاکستان نے ایران اور امریکا کے درمیان مذاکرات میں جو سہولت کاری کی ہے، وہ گزشتہ 5 دہائیوں میں نہیں ہوئی۔
یہ بھی پڑھیے: پاکستان کی ترسیلاتِ زر میں نمایاں اضافہ، معیشت کے لیے مثبت اشارہ
وزیر خزانہ نے اس موقع پر سعودی عرب کے معاشی تعاون کا بھی شکریہ ادا کیا اور کہا کہ سعودی عرب کی بروقت مالی معاونت اور عالمی سطح پر اعتماد میں اضافے سے پاکستان کو معیشت اور بیرونی کھاتوں میں استحکام کے لیے مثبت رفتار حاصل ہوگی۔
واضح رہے کہ سعودی عرب نے پاکستان کے لیے 3 ارب امریکی ڈالر کے اضافی ڈپازٹس کی فراہمی کا وعدہ کیا ہے، جس کی رقم آئندہ ہفتے جاری کیے جانے کی توقع ہے۔
اس کے علاوہ سعودی عرب کا موجودہ 5 ارب ڈالر کا ڈپازٹ اب سالانہ رول اوور کے بجائے طویل مدت کے لیے بڑھا دیا جائے گا۔
