وزیر خزانہ محمد اورنگزیب نے کہا ہے کہ پاکستان اور آئی ایم ایف کے درمیان اسٹاف لیول معاہدہ طے پا چکا ہے، جبکہ اس کی ایگزیکٹو بورڈ سے منظوری مئی کے اوائل میں متوقع ہے۔ ان کے مطابق پاکستان نے عالمی غیر یقینی صورتحال کے باوجود معاشی استحکام برقرار رکھا ہے۔
یہ بھی پڑھیں:اسٹیٹ بینک کو سعودی عرب سے 2 ارب ڈالر موصول، آئی ایم ایف کی پاکستان کے معاشی اصلاحات اور استحکام کی تعریف
واشنگٹن میں سِٹی میکرو فورم اور ورلڈ بینک و آئی ایم ایف کے اسپرنگ اجلاس 2026 کے موقع پر خطاب کرتے ہوئے وزیر خزانہ نے کہا کہ مشرقِ وسطیٰ کا موجودہ بحران حالیہ تاریخ کے بڑے سپلائی شاکس میں سے ایک ہے، جس سے نمٹنے کے لیے پاکستان نے اپنی معاشی حکمتِ عملی کو مزید مضبوط بنایا ہے۔
انہوں نے کہا کہ حکومت نے بحران کے اثرات سے نمٹنے کے لیے خریداری، قیمتوں کے نظام اور لاجسٹکس میں ضروری تبدیلیاں کی ہیں، جبکہ معیشت کو سہارا دینے کے لیے ہدف شدہ معاونت کے نظام کی طرف پیشرفت جاری ہے۔
یہ بھی پڑھیں:وزیر خزانہ محمد اورنگزیب امریکا پہنچ گئے، اہم ملاقاتیں
وزیر خزانہ کے مطابق پاکستان سعودی عرب کی جانب سے 3 ارب ڈالر کی اضافی مالی معاونت اور دیگر اقتصادی تعاون سے بھی فائدہ اٹھا رہا ہے، جس سے بیرونی مالی دباؤ کم کرنے میں مدد ملے گی۔ انہوں نے بتایا کہ پاکستان کے پہلے پانڈا بانڈ کے اجرا کا ہدف بھی مئی مقرر کیا گیا ہے۔
محمد اورنگزیب نے اس بات پر زور دیا کہ حکومت اصلاحاتی ایجنڈے پر قائم ہے اور کسی بھی پالیسی تبدیلی کو ذمہ دارانہ انداز میں کیا جائے گا تاکہ حاصل شدہ معاشی استحکام متاثر نہ ہو۔
