ملک بھر میں شدید گرمی کی لہر کے باعث بجلی کی طلب میں اضافہ ہوا ہے، جس کے نتیجے میں غیر اعلانیہ لوڈشیڈنگ میں نمایاں اضافہ دیکھنے میں آ رہا ہے۔
بجلی کا شارٹ فال قریباً 4 ہزار میگاواٹ تک پہنچ چکا ہے، جس کے باعث مختلف شہروں میں طویل دورانیے کی بندش جاری ہے۔
مزید پڑھیں: وزیراعلیٰ کی دھمکیاں، خیبر پختونخوا میں لوڈشیڈنگ کا دورانیہ 4 گھنٹے سے بڑھ کر 13 گھنٹے ہوگیا
کراچی کے کئی علاقوں میں روزانہ 10 گھنٹے تک بجلی غائب رہتی ہے، جبکہ راولپنڈی میں بھی 8 سے 10 گھنٹے کی لوڈشیڈنگ نے شہریوں کو شدید مشکلات میں ڈال دیا ہے۔
وفاقی دارالحکومت اسلام آباد میں 6 گھنٹے تک بجلی کی بندش رپورٹ ہوئی ہے، جبکہ لاہور کے مختلف علاقوں میں 5 سے 6 گھنٹے تک لوڈشیڈنگ جاری ہے۔
پشاور کے شہری علاقوں میں قریباً 6 گھنٹے اور مضافاتی علاقوں میں 14 گھنٹے تک بجلی کی فراہمی معطل رہی۔
صورتحال کے پیش نظر وزارتِ توانائی نے صنعتی شعبے کو بھی لوڈشیڈنگ کے دائرے میں شامل کر لیا ہے اور بند پاور پلانٹس کو دوبارہ فعال کرنے پر غور کیا جا رہا ہے۔
مزید پڑھیں: خیبر پختونخوا میں بجلی کی لوڈشیڈنگ، عوام وزیر اعلی سے کیا چاہتے ہیں؟
دوسری جانب وفاقی وزیر توانائی اویس لغاری نے اعلان کیا ہے کہ آج سے لوڈشیڈنگ کے دورانیے میں کمی لانے کی کوشش کی جائے گی۔
