لاہور میں اسکوٹی سوار لڑکی سے موبائل فون چھیننے کے واقعے میں ملوث مرکزی ملزم کو پولیس نے زخمی حالت میں گرفتار کر لیا، جبکہ اس کا ساتھی فرار ہونے میں کامیاب ہو گیا۔
میڈیا رپورٹ کے مطابق یہ واقعہ لاہور کے علاقے نواب ٹاؤن او پی ایف میں پیش آیا تھا، جہاں ملزم نے اپنے ساتھی کے ہمراہ موٹر سائیکل پر سوار ہو کر لڑکی سے موبائل فون چھینا۔ پولیس کا کہنا ہے کہ گرفتار ملزم کی شناخت عدنان یوسف کے نام سے ہوئی ہے، جسے چوہنگ کے علاقے سے زخمی حالت میں حراست میں لیا گیا۔
Purse snatching incident in Lahore, OPF society in broad daylight. We hope Punjab Govt. will take strenuous action with the help of CC TV.@CMComplaintCell video courtesy @MohUmair87 pic.twitter.com/X8ZfGj1aDc
— Ghulamuddin (GD) (@GD_Alisher) April 17, 2026
واقعے کا نوٹس لیتے ہوئے وزیراعلیٰ پنجاب مریم نواز نے پولیس کو 8 گھنٹوں کے اندر ملزم کو گرفتار کرنے کی ہدایت دی، جس کے بعد پولیس نے فوری کارروائی کرتے ہوئے ملزم کا سراغ لگایا۔
پولیس ترجمان کے مطابق ملزمان کی تلاش کے لیے جیو فینسنگ اور ہیومن انٹیلیجنس کا سہارا لیا گیا، جبکہ مختلف مقامات پر ناکہ بندی بھی کی گئی۔ ڈی آئی جی آپریشنز کے ترجمان کا کہنا ہے کہ جب پولیس نے ناکے پر ملزمان کو رکنے کا اشارہ کیا تو انہوں نے فرار ہونے کی کوشش کی اور پولیس پر فائرنگ کر دی۔
یہ بھی پڑھیں:لاہور میں اسکوٹی سوار لڑکی سے ڈکیتی، مریم نواز کا 8 گھنٹوں میں ملزم کی گرفتاری کا حکم
فائرنگ کے تبادلے کے دوران ملزم عدنان اپنے ہی ساتھی کی گولی لگنے سے زخمی ہو کر گر پڑا، جبکہ اس کا ساتھی موقع سے فرار ہو گیا۔ پولیس نے زخمی ملزم کو فوری طور پر گرفتار کر کے اسپتال منتقل کر دیا جہاں اسے طبی امداد دی جا رہی ہے۔
پولیس کے مطابق فرار ہونے والے ملزم کی گرفتاری کے لیے کارروائیاں جاری ہیں اور اسے جلد گرفتار کر لیا جائے گا۔
حکام کا کہنا ہے کہ اس کیس کی تفتیش کے دوران سینکڑوں سی سی ٹی وی کیمروں کی فوٹیجز کا جائزہ لیا گیا، جس میں جیو فینسنگ اور انسانی انٹیلیجنس نے اہم کردار ادا کیا۔
ترجمان پولیس کے مطابق ملزمان کے خلاف تھانہ چوہنگ میں مقدمہ درج کر لیا گیا ہے اور مزید قانونی کارروائی جاری ہے۔
